विधानसभा 2019 ची निवडणूक अवघ्या काही दिवसांवर येवून ठेपली असतांना वाडा तालुक्यातील चांबळे व डाकिवलीच्या नागरिकांनी वाडा – भिवंडी महामार्गाला जोडणार्‍या डाकिवली – चांबळे – लोहपे रस्त्याची दुरावस्था झाल्याने येणार्‍या निवडणूकीत मतदानावर बहिष्कार टाकण्याचा निर्णय घेतला आहे.
ग्रामीण विधानसभा क्षेत्रातील वाडा तालुक्यामधील डाकिवली व चांबळे गावातील नागरिकांनी विधानसभा निवडणुकीत बहिष्कार टाकण्याचा निर्णय घेतला आहे. वाडा – भिवंडी महामार्गाला जोडणार्‍या डाकिवली – चांबळे – लोहपे या रस्त्याची दुरावस्था बनली असून या रस्त्यावरून जीवघेणा प्रवास करावा लागत असल्याचे नागरिकांचे म्हणणे आहे. गेल्या दोन वर्षापासून रस्त्यावर पडलेल्या मोठमोठ्या खड्ड्यांमुळे दुचाकी व अन्य वाहनांनी प्रवास करणे धोक्याचे बनले आहे. रोजच प्रवास करणार्‍या विद्यार्थ्यांचेही हाल होताहेत. लोकप्रतिनिधी व प्रशासनाकडे वारंवार मागणी करूनही याकडे दुर्लक्ष होत असल्याने संतप्त नागरिकांनी येत्या 21 तारखेला होणार्‍या मतदानावर बहिष्कार टाकण्याचा निर्णय जाहीर केला आहे.
रस्त्याची अत्यंत दुरावस्था झाली असून आमच्या गावातील विद्यार्थी – विद्यार्थी व महिलाही या रस्त्याने नियमित प्रवास करत असल्याने त्यांना खूप त्रास सहन करावा लागत आहे. तसेच वयोवृद्ध नागरिकांचे हाल होत आहेत.-— कैलास भोईर, ग्रामस्थ, चांबळे
गेल्या दोन वर्षांपासून रस्त्याची खूपच बिकट परिस्थिती झाल्याने व प्रशासन व लोकप्रतिनिधी याकडे दुर्लक्ष करीत असल्यानेच आम्ही या निवडणूकीवर बहिष्कार टाकण्याचा निर्णय घेतला आहे.-— गजानन भोईर, ग्रामस्थ, चांबळे