सध्या फॉर्ममध्ये असलेला फलंदाज सूर्यकुमार यादव टी-२० विश्वचषकात एक्स-फॅक्टर ठरेल, अशी आशा भारतीय संघाचा कर्णधार रोहित शर्मा याने व्यक्त केली आहे. टी-२० विश्वचषक स्पर्धा 16 ऑक्टोबर ते 13 नोव्हेंबर या कालावधीत खेळवली जाणार आहे. भारताचा पहिला सामना 23 ऑक्टोबरला पाकिस्तानविरुद्ध होणार आहे. (cricket suryakumar yadav x factor t20 world cup rohit sharma team india)
आयसीसी टी-२० विश्वचषक स्पर्धा सुरू होण्यापूर्वी झालेल्या पत्रकार परिषदेत रोहित शर्माने सर्यकुमारबाबतचे वक्तव्य केले. “सूर्या चांगल्या फॉर्ममध्ये आहे. मला आशा आहे की तो अशीच फलंदाजी करत राहील. तो आत्मविश्वासू खेळाडू आहे. तो निर्भयपणे खेळतो, तो आपल्या कौशल्याचा कुशलतेने वापर करतो. मला आशा आहे की तो एक्स-फॅक्टर होईल”, असे रोहित शर्मा म्हणाला.
दुखापतीमुळे भारतीय संघातून बाहेर असलेला वेगवान गोलंदाज जसप्रीत बुमराह यावरही रोहित शर्माने भाष्य केले. “दुखापती हा खेळाचा भाग आहे. तुम्ही खूप निराश होऊ शकत नाही. आपण काय करू शकतो याचा विचार केला पाहिजे. आम्ही इतर खेळाडूंना संधी दिली आणि त्यांनी चांगली कामगिरी केली. त्या सर्व खेळाडूंना संधी देणे महत्त्वाचे आहे. यात तुम्ही फार काही करू शकत नाही.हे लक्षात घेण्यासारखे आहे की बुमराहच्या जागी मोहम्मद शमीचा संघात समावेश करण्यात आला आहे”, असे शर्मा म्हणाला.
दरम्यान, फॉर्ममध्ये असलेला फलंदाज सूर्यकुमार यादवने बुधवारी जाहीर केलेल्या आंतरराष्ट्रीय क्रिकेट परिषदेच्या ताज्या T20 आंतरराष्ट्रीय क्रमवारीत फलंदाजांमध्ये दुसरे स्थान कायम राखले आहे. तो भारताचा अव्वल क्रमांकाचा फलंदाज आहे. दक्षिण आफ्रिकेविरुद्ध भारताच्या नुकत्याच झालेल्या T20 मालिकेत सर्वाधिक धावा करणारा सूर्यकुमार पाकिस्तानचा यष्टिरक्षक फलंदाज मोहम्मद रिझवानच्या मागे आहे. सूर्यकुमारला ८३८ गुण आहेत.
टॉप-10 मध्ये सूर्यकुमार हा एकमेव भारतीय फलंदाज आहे. सूर्यकुमारने दक्षिण आफ्रिकेविरुद्धच्या तीन T20 सामन्यांमध्ये सुमारे 200 च्या स्ट्राइक रेटने एकूण 119 धावा केल्या. यादरम्यान त्याच्या बॅटमधून 2 अर्धशतके, 10 चौकार आणि 9 षटकार आले. त्याची फलंदाजीची सरासरीही 59 च्या वर होती.