नवी दिल्ली : केंद्रीय तपास यंत्रणा अंमलबजावणी संचालनालयाने (ईडी) काँग्रेसचे ज्येष्ठ नेते आणि माजी केंद्रीय मंत्री सलमान खुर्शीद यांची पत्नी लुईस खुर्शीद यांची मालमत्ता जप्त केली आहे. तपास यंत्रणेने पीएमएलए अंतर्गत काँग्रेस नेते सलमान खुर्शीद यांची पत्नी लुईस आणि इतर आरोपींची 45.92 लाख रुपयांची मालमत्ता जप्त केली आहे. (ED action against Salman Khurshids wife assets worth lakhs seized)
हेही वाचा – Uddhav Thackeray : शिवसेनेने खांद्यावर बसवून महाराष्ट्र फिरवला नसता तर…; ठाकरेंची भाजपावर टीका
मिळालेल्या माहितीनुसार, हे संपूर्ण प्रकरण डॉ. झाकीर हुसेन मेमोरियल ट्रस्टमधील घोटाळ्याशी संबंधित आहे. ट्रस्टचे पैसे वैयक्तिकरित्या वापरल्याचा आरोप आहे. या प्रकरणी उत्तर प्रदेश पोलिसांनी लुईस खुर्शीद आणि इतर आरोपींविरुद्ध 17 प्रकरणात आरोपपत्र दाखल केले होते. या प्रकरणाचा ताबा घेतल्यानंतर ईडीने पीएमएलए अंतर्गत गुन्हा नोंदवून तपास सुरू केला. यावेळी त्यांनी उत्तर प्रदेश फर्रुखाबाद येथील 29.51 लाख रुपयांची संपत्ती आणि 4 बँक खात्यांमधील 16.41 लाख रुपये जप्त केले आहेत.
काय आहे प्रकरण?
2009-2010 या वर्षात डॉ. झाकीर हुसेन मेमोरियल ट्रस्टने सुमारे 17 शिबिरे आयोजित करून अपंगांना कृत्रिम अवयवांचे उपकरण वाटपाच्या प्रकरणात फसवणूक केल्याचा आरोप आहे. 2017 मध्ये हे प्रकरण लोकांसमोर आल्यानंतर अनेक तक्रारी नोंदविण्यात आल्या. दिव्यांगांना कृत्रिम अवयवदानाची उपकरणे वाटप करताना विकास गट भोजीपुरा येथे बनावट शिक्का, बनावट स्वाक्षरी आणि सरकारी पैशांचा गैरवापर केल्याचा आरोप करण्यात आला होता. मात्र, या प्रकरणाचा तपास केल्यानंतर स्थानिक पोलिसांनी आरोपपत्रही दाखल केले आहे. आरोपपत्र दाखल झाल्यानंतर दोन्ही आरोपींना न्यायालयात हजर राहण्यासाठी अनेकवेळा वॉरंट बजावण्यात आले आणि त्यावेळी अटक होण्याची शक्यता होती, मात्र नंतर दोन्ही आरोपींना न्यायालयाकडून दिलासा मिळाला.
हेही वाचा – Jitendra Awhad : दुसरी-तिसरीतील मुलांकडून कसले अभिप्राय घेताय? आव्हाडांनी काढले सरकारचे वाभाडे
सलमान खुर्शीद यांच्या पत्नीचे नाव कसे जोडले गेले?
अहवालानुसार, दिव्यांगांना उपकरणे वाटप करण्यासाठी केंद्रीय सामाजिक न्याय आणि अधिकारिता मंत्रालयाने माजी कायमगंज आमदार लुईस खुर्शीद यांच्या देखरेखीखाली चालवल्या जाणाऱ्या डॉ. झाकीर हुसेन मेमोरियल ट्रस्ट फारुखाबादला 71.50 लाख रुपयांचे अनुदान दिले होते. सर्व जिल्ह्यांमध्ये शिबिरे आयोजित करून अपंगांना मोफत उपकरणे वाटप करून चाचणीचा अहवालही मंत्रालयात पाठवायचा होता. ट्रस्टने बरेली जिल्हा ब्लॉक भोजीपुरा येथे एक शिबिर देखील आयोजित केले होते आणि 21 अपंग लोकांना उपकरणे वितरित करण्यासाठी चाचणी अहवाल मंत्रालयाकडे पाठविला होता. मंत्रालयाने तपासणी केली असता भोजीपुरा येथे एकही छावणी उभारली नसल्याचे आढळून आले. तर अहवालावर जिल्हा अपंग कल्याण अधिकारी व गटविकास अधिकारी, भोजीपुरा यांच्या बनावट स्वाक्षऱ्यांचा शिक्का मारण्यात आला होता. त्यानंतर सलमान खुर्शीद यांच्या पत्नीचे नाव या प्रकरणाशी जोडले गेले.
