कोल्हापूर : देशात एकूण सात टप्प्यात लोकसभा निवडणूक होणार आहे. यातील दोन टप्पे पार असून उर्वरीत टप्पे होणे बाकी आहे. मात्र त्याआधीच पंतप्रधान नरेंद्र मोदी यांनी दुसऱ्या टप्प्यानंतर भाजपा, एनडीए 2-0 अंतराने पुढे आहे, असा विश्वास व्यक्त केला आहे. (After the second phase of Lok Sabha Election 2024 BJP NDA lead by 2-0 Narendra Modi kolhapur constituency)
पंतप्रधान नरेंद्र मोदी आज सभेत बोलताना म्हणाले की, कोल्हापूरला महाराष्ट्राचे फुटबॉल हब म्हटले जाते. इथल्या तरुणांमध्ये फुटबॉल खूप लोकप्रिय आहे. त्यामुळे मी फुटबॉलच्या भाषेत म्हटलं तर दुसऱ्या टप्प्याचं मतदान पूर्ण झाल्यानंतर भाजपा आणि एनडीए 2.0 आघाडीवर आहेत. तर दुसरीकडे काँग्रेस आणि भारतीय युतीने देशविरोधी आणि द्वेषपूर्ण राजकारणाचे दोन स्वार्थी गोल केले आहेत, त्यामुळे पुन्हा एकदा मोदी सरकार हे निश्चित झाले आहे, असा विश्वास मोदींनी व्यक्त केला.
हेही वाचा – Ujjwal Nikam : उमेदवारी जाहीर होताच उज्ज्वल निकम म्हणतात, राजकारण करणार नाही
नरेंद्र मोदी म्हणाले की, जेव्हा काँग्रेस आणि त्यांच्या मित्रांना लक्षात आले की, ते एनडीएच्या विकासाच्या ट्रॅक रेकॉर्डशी बरोबरी करू शकत नाहीत, तेव्हा त्यांनी आपली रणनीती बदलली. ते देशविरोधी अजेंडा आणि तुष्टीकरणाचा वापर करत आहेत. आता, काँग्रेसचा अजेंडा असा आहे की, ते काश्मीरमध्ये कलम 370 पुन्हा लागू करतील. हे लोक म्हणत आहेत की, जर त्यांचे सरकार बनले तर ते सीएए रद्द करतील. पण हा देश त्यांना हे करू देईल का? ज्यांची लोकसभेची जागा तीन आकड्यांमध्ये जिंकण्याची शक्यता नाही, ते सरकार बनवू शकतील का? असा प्रश्नही मोदींनी उपस्थित केला
नरेंद्र मोदी पुढे म्हणाले, इंडिया आघाडीचे लोक आता देशावर राग काढत आहेत. कर्नाटक आणि तमिळनाडूमध्ये यांचे नेते दक्षिण भारताचे विभाजन करण्याची भाषा वापरत आहेत. पण ते शक्य आहे का? छत्रपती शिवाजी महाराजांच्या काळात अहद पेशावर, तहद तंजावर, हिंदवी स्वराज्य अशी घोषणा ज्या मातीत दिली गेली, ती माती इंडिया आघाडीच्या मनसुब्यांना पूर्ण करून देईल का? त्यामुळे विभाजनवादी भाषा बोलणाऱ्यांना तुम्ही चोख प्रत्युत्तर द्या, असे आवाहन मोदींनी कोल्हापूरकरांनी केले.
हेही वाचा – Lok Sabha 2024 : पूनम महाजनांचा पत्ता कट, उत्तर-मध्यमधून उज्ज्वल निकम महायुतीचे उमेदवार
