मुंबई : बॉलिवूडचे सुप्रसिद्ध कला दिग्दर्शक नितीन देसाई यांच्या पार्थिवावर आज, शुक्रवारी त्यांच्याच एन. डी. स्टुडिओमध्ये शासकीय इतमामात अंत्यसंस्कार करण्यात आले. यावेळी अनेक कलावंतांसह राजकीय, सामाजिक क्षेत्रातील अनेक मान्यवर उपस्थित होते.
नितीन देसाई यांनी बुधवारी (2 ऑगस्ट) कर्जतमधील एन. डी. स्टुडियोत गळफास घेऊन आत्महत्या केली. हा स्टुडिओ त्यांनीच उभा केला होता. नितीन देसाई यांच्या पश्चात पत्नी, दोन मुली, एक मुलगा, एक भाऊ आणि बहीण असा परिवार आहे.
मधुर भांडारकर, आमिर खान, आशितोष गोवारीकर, रवी जाधव, शिवसेना नेते शिशिर शिंदे यांनी अंत्यदर्शन घेतले.
राज्यसभा खासदार उदयनराजे भोसले आणि भाजप नेते विनोद तावडे यांच्यासह मराठी सिनेइंडस्ट्रीतील सुबोध भावे, मानसी नाईक, निखिल साने यांनी अंत्यदर्शन घेतले.
नितीन देसाई यांच्या पार्थिवाला पोलिसांनी मानवंदना दिली. यावेळी अनेक कलावंतांसह राजकीय, सामाजिक क्षेत्रातील अनेक मान्यवर उपस्थित होते.
नितीन देसाई आत्महत्येप्रकरणी खालापूर पोलीस ठाण्यात पहिला गुन्हा दाखल करण्यात आला आहे. ईसीएल फायनान्स कंपनी व एडलवाईस ग्रुपचे पदाधिकारी अशा एकूण 5 जणांविरोधात गुन्हा दाखल करण्यात आला आहे. कर्ज प्रकरणात वारंवार तगादा लावून आत्महत्येस प्रवृत्त केल्याप्रकरणी पोलिसांनी गुन्हा दाखल केला आहे.
