भारत आणि इंग्लंड यांच्यातील पहिला एकदिवसीय सामना मंगळवारी (काल) झाला. कसोटी आणि टी-२० मालिकेत भारताने पहिले सामने गमावले होते. एकदिवसीय मालिकेची मात्र विजयी सुरुवात करण्यात भारताला यश आले. भारताने पहिला एकदिवसीय सामना ६६ धावांनी जिंकत तीन सामन्यांच्या या मालिकेत १-० अशी आघाडी घेतली. भारताच्या या विजयात वेगवान गोलंदाज प्रसिध कृष्णाने महत्वाची भूमिका बजावली. प्रसिधला या सामन्यात आंतरराष्ट्रीय क्रिकेटमध्ये पदार्पणाची संधी मिळाली. या संधीचे सोने करताना त्याने ५४ धावांच्या मोबदल्यात ४ विकेट घेतल्या. या कामगिरीसह त्याने अनोखा विक्रम रचला. एकदिवसीय क्रिकेटमध्ये पदार्पणात ४ विकेट घेणारा तो भारताचा पहिलाच गोलंदाज ठरला.
भारताला विजय मिळवून दिला
प्रसिधला इंग्लंडच्या डावाच्या सुरुवातीला चांगली गोलंदाजी करता आली नाही. इंग्लंडचे सलामीवीर जॉनी बेअरस्टो आणि जेसन रॉय यांनी त्याच्या गोलंदाजीवर फटकेबाजी केली. त्याने पहिल्या ३ षटकांत ३७ धावा खर्ची केल्या होत्या. मात्र, त्याने दमदार पुनरागमन करत रॉय आणि बेन स्टोक्स यांना बाद करत इंग्लंडला अडचणीत टाकले. त्यानंतर त्याने सॅम बिलिंग्स आणि टॉम करन यांना माघारी पाठवत भारताला विजय मिळवून दिला.
नोएल डेविडचा विक्रम मोडला
प्रसिधने ८.१ षटकांत ५४ धावांत ४ विकेट घेतल्या. एकदिवसीय क्रिकेटमध्ये पदार्पणात भारतीय गोलंदाजाची ही सर्वोत्तम कामगिरी ठरली. याआधी हा विक्रम नोएल डेविडच्या नावे होता. डेविडने १९९७ मध्ये विंडीजविरुद्ध एकदिवसीय क्रिकेटमध्ये पदार्पण करताना २१ धावांत ३ विकेट घेतल्या होत्या. तसेच प्रसिध एकदिवसीय क्रिकेटमध्ये पदार्पणात ४ विकेट घेणारा भारताचा पहिलाच गोलंदाज ठरला.