शाहरुख खानचा मुलगा आर्यन खानच्या जामीन अर्जावर मुंबई हायकोर्टात सुरू झालेल्या सुनावणीला मंगळवारी स्थगिती देण्यात आली आहे. बुधवारी पुन्हा एकदा या जामीन अर्जावर युक्तिवाद होईल. मंगळवारी दिवसभरात फक्त आर्यन खानचे वकील मुकूल रोहतगी यांनी बाजू मांडली. बुधवारी एनसीबीचे वकील त्यांची बाजू मांडणार आहेत.
क्रूझ रेव्ह आणि ड्रग्स पार्टी प्रकरणात न्यायालयीन कोठडीत असलेल्या आर्यन खानने मुंबई हायकोर्टात जामिनासाठी अर्ज केलेला आहे. या अर्जावर आज सुनावणी झाली. यावेळी आर्यन खानची बाजू ज्येष्ठ वकील मुकूल रोहतगी यांनी मांडली.
आर्यनच्या बाजूने मुकूल रोहतगी यांनी तब्बल दोन तास युक्तिवाद केला. यावेळी त्यांनी अनेक धक्कादायक माहिती देतानाच आर्यन खान कसा निर्दोष आहे हे कोर्टासमोर ठेवण्याचा प्रयत्न केला. क्रूझवर जाण्यापूर्वीच आर्यन खानला अटक करण्यात आली. अटक करण्यापूर्वी त्याची वैद्यकीय चाचणी करण्यात आली नव्हती, असे रोहतगी यांनी कोर्टाला सांगितले.
आर्यन खानचा संबंध फार तर अरबाज मर्चंट तसेच अचित कुमार यांच्याशी जोडला जाऊ शकतो; पण यातील अचित कुमार हा क्रूझवर नव्हता. त्याला घरून अटक करण्यात आली आहे. आर्यन तसेच अचित यांच्यात ऑनलाईन गेमिंगसंदर्भात चर्चा झाली. विशेष म्हणजे ही चॅटिंग 12 ते 14 महिन्यांपूर्वी झाली आहे, असा दावा रोहतगी आणि आणि अमित देसाई यांनी केला.
मुकूल रोहतगी यांनी कोर्टात पंचनामा वाचून दाखवला. आर्यन खानवर NDPS च्या 8(c), 20b, 27 आणि कलम 35 अंतर्गत गुन्हा दाखल करण्यात आलाय. या कलामांतर्गत गुन्हा सिद्ध झाला तर कमाल 1 वर्षाची शिक्षा दिली जाते. कोर्टाने रोहतगी यांना आर्यन खानच्या मोबाईलमधील व्हॉट्सअ‍ॅप चॅटिंगचा क्रूझ पार्टीशी काय संबंध आहे?, असा प्रश्न विचारला. त्याला उत्तर देताना आर्यन खानची चॅटिंग ही सगळी क्रूझ पार्टीच्या आधीची असल्याचा दावा रोहतगी यांनी केला.
न्यायमूर्ती न्यायासनावरून उठून गेले
क्रूझवरील ड्रग्स पार्टी प्रकरणात अटक करण्यात आलेला अभिनेता शाहरुख खान याचा मुलगा आर्यन खानच्या जामिनावरील सुनावणीपूर्वीच कोर्टात नाट्यमय घटना घडली. या सुनावणीसाठी कोर्टात झालेली प्रचंड गर्दी पाहून न्यायमूर्ती संतापले आणि न्यायासनावरून उठून गेले.
शाहरुख खान याने आर्यनच्या सुटकेसाठी वकिलांची फौज उभी केली होती. आर्यनच्या जामिनावरील सुनावणीसाठी कोर्टात मंगळवारी मोठी गर्दी झाली होती. आर्यन प्रकरणाशी संबंध नसलेल्या वकिलांनीही गर्दी केली होती. ही गर्दी पाहून न्यायमूर्ती नितीन सांब्रे न्यायासनावरून उठून गेले आणि कोरोना सुरक्षितता नियमांचे पालन करण्याची व्यवस्था करावी, असे त्यांनी कोर्ट असोशिएटना सांगितले. न्यायमूर्तींच्या आदेशानुसार गर्दी कमी करण्यास सुरुवात केली आहे. ज्यांचे प्रकरण सुनावणीला नाही, त्यांना कोर्टाबाहेर जाण्याचे निर्देश असोशिएटने दिले. त्यामुळे कोर्टाचे कामकाज थांबले.
असोशिएटच्या निर्देशानुसार पोलिसांनी सगळ्यांना बाहेर काढलेे. सर्व पत्रकारांनाही बाहेर काढले. आर्यनच्या प्रकरणाची सुनावणी सुरू होण्यापूर्वी पत्रकारांना प्रथम प्रवेश दिला जाईल, अशी हमी कोर्टाच्या असोशिएटने दिली आहे. कोर्टाबाहेरही कोरोनाविषयक नियमांचे तीनतेरा वाजले आहेत. वकिलांनी विनाकारण गर्दी केली आहे. त्यामुळे वकील वर्ग आणि पोलिसांमध्ये शाब्दिक बाचाबाचीही झाली.
दोन आरोपींना जामीन
क्रूझ ड्रग्स प्रकरणात दोन आरोपींना विशेष न्यायालयाने दिलासा दिला आहे. आरोपी मनीष राजगीर आणि अविन साहू या दोघांना विशेष एनडीपीएस कोर्टाकडून जामीन मंजूर करण्यात आला आहे. या प्रकरणात जामीन मिळालेले हे पहिले आरोपी आहेत. मनीष राजगीर याच्यावर 2.4 ग्रॅम गांजा बाळगल्याचा आरोप होता आणि अविन साहू याच्यावर ड्रग्सचे सेवन केल्याचा आरोप होता. क्रूझवरून या दोघांना अटक करण्यात आली होती. दरम्यान, विनंती करूनही एनसीबीने आपल्या रक्ताचे नमुने चाचणीसाठी घेतले नसल्याचा दावा अविन साहू याने केला होता.
माझी बदली झालेली नाही. केवळ वावड्या उठवण्यात आल्या आहेत.
-समीर वानखेडे, विभागीय संचालक, एनसीबी.
