पालघर : हिंदुहृदयसम्राट बाळासाहेब ठाकरे महाराष्ट्र समृद्धी महामार्गावर अपघातांची संख्या दिवसेंदिवस वाढताना दिसत आहे. शिर्डी जवळील कोपरगाव तालुक्यातील कोकमठाण शिवारात समृद्धी महामार्गावर भीषण अपघात झाला. आयशर वाहनाला मागून क्रुझर वाहनाने धडक दिल्याची घटना शुक्रवारी पहाटे रात्री एक वाजताच्या सुमारास घडली. या दुर्दैवी घटनेत पती-पत्नीसह दीड वर्षांच्या मुलीचा मृत्यू झाला.
या प्रकरणी कोपरगाव शहर पोलीस ठाण्यात गुन्हा नोंदविण्याचे काम सुरू होते. संतोष अशोक राठोड (वय 35) त्यांची पत्नी वर्षा संतोष राठोड (वय 29) आणि मुलगी अवनी संतोष राठोड दीड वर्ष अशी मृत व्यक्तींची नावे आहेत. दरम्यान, या दुर्घटनेत संतोष राठोड यांचा पाच वर्षाचा मुलगा अर्णव याच्यासह इतर पाच ते सहा जण जखमी असून त्यांच्यावर आत्मा मालिक रूग्णालयात उपचार सुरू आहेत. कोपरगाव शहर पोलिसांनी घटनास्थळी पोहचून मृत व्यक्तींचे मृतदेह शवविच्छेदनासाठी कोपरगाव ग्रामीण रुग्णालयात पाठवले आहे.
विरार येथील संतोष राठोड हे मूळचे जालना जिल्ह्यातील मंठा तालुक्यातील गोसावी पांगरी येथील रहिवाशी असून ते परिवारासह लहान भाऊ कृष्णाच्या लग्नासाठी जालना येथे मूळगावी आले होते. 26 जून रोजी कृष्णा राठोड यांचे जालन्याजवळील एका गावात लग्न झाल्यानंतर ते 29 जून रोजी आपल्या परिवारासह क्रुझर वाहनात बसून रात्री समृद्धी महामार्गावरून मुंबईकडे निघाले होते.
कोपरगाव तालुक्यातील कोकमठाण शिवारात पोहोचल्यानंतर तेथून जाणाऱ्या आयशर टेम्पो क्र. एमएच 20 सिटी 6656 तर क्रुझर चालकासह 5 ते 6 जण जखमी झाले आहेत.
जखमींवर आत्मा मालिक हॉस्पिटल येथे उपचार सुरू आहेत. दरम्यान, आयशर चालकाने क्रुझर जीप चालकाविरोधात कोपरगाव शहर पोलीस ठाण्यात फिर्याद दिली आहे. त्यावरून गुन्हा नोंदवण्याचे काम सुरू आहे. लग्न होऊन दोनच दिवस झालेल्या कृष्णा राठोड (वय 27) आणि त्यांची पत्नी कोमल राठोड (वय 19) हे देखील या अपघातात जखमी झाले आहेत. तसेच मयत संतोष यांची आई बताबाई अशोक राठोड (वय 65) यांच्यावर उपचार सुरू आहेत. घटनेचा पुढील तपास कोपरगाव शहर पोलीस करत आहे.
हेही वाचा : Mumbai Rain: मुंबईत पावसाचा हाहाकार, रेल्वेसह रस्ते वाहतूक विस्कळीत, नागरिक बेहाल
