मुंबईला पाणीपुरवठा करणाऱ्या पिसे येथील न्यूमॅटिक गेट सिस्टिम मधील एअर ब्लॅडर बदलण्याचे काम १ ते १० नोव्हेंबर या कालावधीत करण्यात येणार आहे. त्यामुळे या दहा दिवसांत मुंबईच्या पाणीपुरवठ्यात दहा टक्के कपात करण्यात येणार आहे.
सदर तातडीच्या दुरुस्ती कामामुळे मुंबई महापालिकेतर्फे ठाणे व भिवंडी महापालिकेस होणाऱया पाणीपुरवठ्यावर परिणाम होणार आहे. त्यामुळे मुंबईकरांनी सदर दहा दिवसांत आवश्यक पाण्याचा साठा करून त्याचा जपून वापर करावा, असे आवाहन मुंबई महापालिका प्रशासनाकडून करण्यात आले आहे.
जून महिन्यात सुद्धा मुंबईत १० टक्के पाणी कपात करण्यात आलं होतं. तसेच मुंबईकरांना पाणी जपून वापरण्याचं आवाहन पालिकेकडून करण्यात आलं होतं. म्हणावा तसा पाऊस न झाल्यानं मुंबईकरांना पाणी कपातीला सामोरं जावं लागलं होतं. सात तलावांमध्ये दहा टक्क्यांपेक्षाही कमी पाणीसाठा शिल्लक असल्यानं पाणी कपातीचा निर्णय घेण्यात आला होता.