नागपूर : नागपूरमध्ये काल (ता.17 डिसेंबर) स्फोटक बनवणाऱ्या कंपनीमध्ये भीषण स्फोटात 9 जणांचा मृत्यू झाला. या घटनेची माहिती मिळताच एकनाथ शिंदे यांनी घटनास्थळी जाऊन परिस्थितीची पाहणी केली. त्याचं प्रमाणे मृतांच्या कुटंबियांना 5 लाख रूपयांच्या मदतीची घोषणा सरकारने केली. त्यानंतर मुंबईहून नागपुरला परतल्यानंतर मुख्यमंत्री एकनाथ शिंदे यांनी तात्काळ बाजार गावातील सोलर अर्नामेंट्स कंपनीला भेट देऊन पाहणी केली. या घटनेचा आढाला घेऊन पुन्हा नागपुरकडे परतत असताना गोंडखैरीच्या बस स्थानकाजवळ एक अपघात झाल्याचे त्यांना समजले. याठिकाणी झालेल्या भीषण अपघातात एका ट्रक आणि बाईकची धडक होऊन बाईचालक ट्रकच्या बोनेटमध्ये जाऊन अडकला होता. त्याचवेळी ट्रकला एक कार येऊन धडकली.
हेही वाचा… CM Eknath Shinde : मुंबईतील ‘स्वच्छता मोहीम’ आता महाराष्ट्रभर; मुख्यमंत्री एकनाथ शिंदे यांचा निर्धार
त्या गाडीतले काही जण जखमी झाले. अपघात झाल्याचे कळताच त्याठिकाणी गर्दी जमली, ही परिस्थीती पाहून एकनाथ शिंदे यांनी आपला ताफा तिथे थांबवायची सूचना केली. त्यानंतर ते स्वता: गाडीतून खाली उतरले. त्या ठिकाणी उभे राहून त्यांनी त्या तरूणाला प्रयत्नपूर्वक ट्रकखालून बाहेर काढायला लावले. त्याचा पाय गंभीर जखमी असल्याने तत्काळ त्याला आपल्या ताफ्यातील रूग्णवाहिका देऊन शिंदे स्वत: त्याला नागपुरातील रवी नगर चौकातील सेनगुप्त रूग्णालयात घेऊन आले.
मुख्यमंत्री एकनाथ शिंदे हे देवदूताप्रमाणे धावून आल्याने एका व्यक्तीचे प्राण वाचले आहेत. या व्यक्तीसह अन्य तिघांना मदत करुन मुख्यमंत्र्यांनी त्यांना तत्काळ खाजगी रुग्णालयात दाखल करून त्यांच्यावर उपचार करण्याचे निर्देश संबंधित रुग्णालयातील डॉक्टरांना दिले.
या तरुणाला तत्काळ अतिदक्षता विभागात दाखल करून त्याच्यावर उपचार सुरू झाले असून त्याची प्रकृती आता स्थिर आहे. या तरुणाचे नाव गिरीश केशरावजी तिडके असे असून तो नागपूरच्या गोंड खैरीवाडी येथील रहिवासी आहे. त्याच्याशिवाय या अपघातात जखमी झालेले वंदना राकेश मेश्राम (सिद्धार्थ नगरवाडी, नागपूर), रंजना शिशुपाल रामटेके (राहणार रामबाग मेडिकल चौक नागपूर) आणि शुद्धधन बाळूजी काळपांडे (राहणार मौदा नागपूर) यांनाही रुग्णालयात दाखल करून त्यांच्यावर डॉक्टरांकडून उपचार सुरू झाले आहेत.
या तरुणाला बाहेर काढण्यापासून त्याला रुग्णालयात दाखल करेपर्यंत मुख्यमंत्री एकनाथ शिंदे हे स्वतः रुग्णालयात उपस्थित होते. मुख्यमंत्र्यांनी स्वतः पालक बनून या जखमी रुग्णांना तत्काळ रुग्णालयात दाखल केल्यामुळे हे सर्व प्रवासी सुरक्षीत असून त्यांची प्रकृती आता स्थीर आहे. मुख्यमंत्र्यांनी समयसूचकता दाखवून केलेल्या या मदतीबद्दल या रुग्णांच्या कुटूंबियांनी त्यांचे आभार मानले आहेत.
