पंतप्रधान नरेंद्र मोदी यांची आज सायंकाळी गोंदिया येथे सभा होता आहे. लोकसभा निवडणुकीच्या प्रचारार्थ मोदी यांची राज्यात होणारी ही दुसरी सभा असून आज ते कोणाला लक्ष्य करणार याकडे अनेकांचे लक्ष आहे. आपल्या अधिकृत ट्वीटर हॅँडलवरून त्यांनी या सभेबदद्दलची माहिती मराठीमध्ये दिली आहे, ‘पुन्हा एकदा महाराष्ट्रात येतोय. गोंदिया येथे आपल्याशी संवाद साधेन’ असे त्यांनी त्यात म्हटलेय.
अलिकडेच पंतप्रधान नरेंद्र मोदी यांनी वर्धा येथील सभेत राष्ट्रवादी कॉँग्रेसचे नेते शरद पवार यांच्यावर टिका केली होती. त्या टिकेवरील चर्चेचा धुराळा अजूनही राज्यात खाली बसलेला नाही, तोवर आज पुन्हा एकदा ते काय बोलतील याची भाजपाच्या कार्यकर्त्यांसह विरोधकांनाही उत्सुकता लागून आहे. आज केलेल्या आपल्या ट्वीटमध्ये त्यांनी पुन्हा एकदा कॉँग्रेस-राष्ट्रवादी आघाडीचा समाचार घेतला आहे. ही गरीबहित विरोधी आघाडी असून येथील जनतेशी त्यांची नाळ कधी जुळलीच नसल्याचे त्यांनी त्यात म्हटलेय.
पुन्हा एकदा महाराष्ट्रात येतोय् !
गोंदिया येथे आज आपल्याशी संवाद साधेन!
काँग्रेस-राष्ट्रवादी ही गरिबहित-विरोधी आघाडी आहे. जनतेशी त्यांची कधीही बांधिलकी नव्हती, ना त्यांच्या नेत्यांची कधी जनतेशी नाळ जुळली. म्हणूनच आज महाराष्ट्रातील जनता महायुतीच्या पाठिशी भक्कमपणे उभी आहे.— Chowkidar Narendra Modi (@narendramodi) April 3, 2019
भंडारा-गोंदिया लोकसभा निवडणुकीतील भाजप-शिवसेना-रिपाई (आ) महायुतीचे उमेदवार सुनिल मेंढे यांच्या प्रचारार्थ पंतप्रधान नरेंद्र मोदी यांची जाहीर सभा आज (३ एप्रिल)सायंकाळी ५ वाजता बालाघाट रोड टी पार्इंट, बायपास मार्ग परिसरातील अटलधाम मैदानावर आयोजित करण्यात आली आहे.
