इन्स्टिट्यूट फॉरचेस एक्सलन्सतर्फे मुंबई शहर बुध्दिबळ संघटना आणि आयडियल स्पोर्ट्स अकॅडमी सहकार्याने आंतरराष्ट्रीय बुध्दिबळ दिनानिमित्त झालेल्या विविध वयोगट जलद बुध्दिबळ स्पर्धेत सारा नाईक, मान्वी चौधरी, गार्गी तळवेलकर यांनी गटविजेतेपद पटकाविले. ८ वर्षांखालील मुलींच्या गटात अपराजित सारा नाईकने निर्णायक फेरीत भाविका भंडारीला शह देऊन साखळी चौथ्या गुणासह विजेतेपद पटकाविले.
समान साखळी ३ गुण घेऊनही सरस सरासरीच्या बळावर भाविका भंडारीने द्वितीय, अन्वी मोहपात्राने तृतीय तर आश्रिता गुटूलाने चौथा क्रमांक मिळविला. शिवछत्रपती पुरस्कार विजेते लीलाधर चव्हाण व मुंबई शहर बुध्दिबळ संघटनेचे सेक्रेटरी राजाबाबू गजेंगी यांच्या हस्ते विजेत्यांना गौरविण्यात आले. १० वर्षाखालील मुलींमध्ये मान्वी चौधरी व हिमांशी तेंडुलकर यांचे समान साखळी ३.५ गुण झाल्यामुळे उत्तम सरासरीचा लाभ उठवत मान्वी चौधरीने प्रथम क्रमांक पटकाविला.
हिमांशी तेंडूलकरने द्वितीय तर ३ गुणांसह नक्षत्रा शिर्सेकरने तृतीय क्रमांक मिळविला. १२ वर्षाखालील मुलींमध्ये अपराजित गार्गी तळवेलकरने सर्वाधिक साखळी ४ गुण नोंदवून विजेतेपदाला गवसणी घातली. गौरी सारस्वतने (३ गुण) द्वितीय तर यशश्री सुर्वेने (३ गुण) तृतीय क्रमांक मिळविला. शारदाश्रम विद्या मंदिर-दादर येथे मुंबई ठाणे, रायगड, पालघर जिल्ह्यातील सबज्युनियर बुध्दिबळपटूंनी विविध वयोगटात उत्स्फूर्तपणे सहभाग नोंदविला.