नवी दिल्ली: दिल्लीचे मुख्यमंत्री अरविंद केजरीवाल यांनी माझे ऐकले नाही आणि आता त्यांना अटक करण्यात आल्याचे समाजसेवक अण्णा हजारे म्हणाले. केजरीवाल आणि मनीष सिसोदिया आमच्यासोबत आले, तेव्हा मी त्यांना सांगितले की, देशाचे कल्याण नेहमी सर्वप्रथम ठेवा. मात्र त्यांनी त्याकडे दुर्लक्ष केलं. आता मी त्यांना कोणताही सल्ला देणार नाही. (CM Kejriwal I m not sorry he didn t listen to me Anna Hazare ns reaction to Kejriwal s arrest)
दिल्लीतील दारू घोटाळ्यात मुख्यमंत्री अरविंद केजरीवाल यांच्या अडचणीत वाढ होत आहे. दरम्यान, केजरीवाल यांच्या अटकेबाबत सामाजिक कार्यकर्ते अण्णा हजारे यांनी मोठे वक्तव्य केले आहे. त्यांनी माझे ऐकले नाही याचे मला वाईट वाटते, असे अण्णा हजारे म्हणाले.
अण्णा हजारे म्हणाले की, मुख्यमंत्री झाल्यानंतर मी केजरीवाल यांना नवीन दारू धोरणाबाबत दोनदा पत्रे लिहिली होती. त्यावेळी त्यांनी माझे ऐकले नाही याचे मला वाईट वाटते आणि आता यासाठी त्यांना अटक करण्यात आली आहे.
हजारे म्हणाले की, केजरीवाल आणि मनीष सिसोदिया नुकतेच आमच्यात सहभागी झाले होते, तेव्हा मी त्यांना नेहमी देशाच्या हितासाठी काम करण्यास सांगितले होते. पण त्यांनी हे लक्षात ठेवले नाही. आता मी त्यांना कोणताही सल्ला देणार नाही, असे हजारे म्हणाले. कायदा आणि सरकारला जी काही कारवाई करायची आहे, ती त्यांनी करावी.
दिल्लीचे नवीन मद्य धोरण नोव्हेंबर 2021 मध्ये लागू करण्यात आले होते. मात्र हे धोरण सुरुवातीपासूनच वादात राहिले. नंतर, दिल्लीच्या तत्कालीन मुख्य सचिवांनी एलजी व्हीके सक्सेना यांना एक अहवाल सादर केला, ज्यामध्ये मद्य धोरणात अनियमितता असल्याचा आरोप करण्यात आला होता. याप्रकरणी सीबीआयने गुन्हा दाखल केला. मनी लाँड्रिंगचा तपास करण्यासाठी ईडीनेही गुन्हा दाखल केला आहे.
दिल्लीतील या कथित दारू घोटाळ्यात अटक होणारे केजरीवाल हे चौथे मोठे नेते आहेत. त्यांच्या आधी मनीष सिसोदिया यांना गेल्या वर्षी 26 फेब्रुवारीला अटक करण्यात आली होती. गेल्या वर्षीच 4 ऑक्टोबरला ईडीने आम आदमी पक्षाचे राज्यसभा खासदार संजय सिंह यांना अटक केली होती. त्यानंतर या महिन्यात 15 मार्च रोजी ईडीने तेलंगणाचे माजी मुख्यमंत्री केसीआर यांची मुलगी के. कवितालाही अटक करण्यात आली होती.
सध्या केजरीवाल ईडीच्या ताब्यात आहेत. त्यांना पीएमएलए न्यायालयात हजर करण्याची तयारी सुरू आहे. दरम्यान, केजरीवाल यांच्या वकिलांनी त्यांच्या अटकेला आव्हान देत सर्वोच्च न्यायालयात याचिका दाखल केली होती. मात्र आता त्यांनी ही याचिका मागे घेतली आहे. केजरीवाल यांचे वकील अभिषेक मनु सिंघवी यांनी न्यायालयाला सांगितले की, केजरीवाल यांचा रिमांड आणि सर्वोच्च न्यायालयासमोरील त्यांची याचिका एकमेकांशी क्लॅश होत असल्याने आम्ही याचिका मागे घेण्याचा निर्णय घेतला आहे.
