लाडक्या बाप्पांना निरोप देऊन गावांकडून शहरांकडे निघालेल्या चाकरमान्यांचा परतीचा प्रवासही खडतरच होत आहे. पावसासह खड्ड्यांच्या जाळ्यामुळे मुंबई-गोवा महामार्गासह वाकण-खोपाली महामार्गही संथ झाल्याचे दृश्य पहावयास मिळत आहे.
गेल्या आठ दिवसांपासून गावी राहिलेले चाकरमानी गौरी-गणपती विसर्जनानंतर लगेचच परतीच्या प्रवासाला लागलेले असल्यामुळे शनिवारी दुपारपासूनच काहीसे शांत झालेले हे मार्ग कार, जीप, टेम्पो, तसेच एसटी व खासगी बसेसने फुलून गेले आहेत. गोवा महामार्गाच्या बाजूने धावणारी कोकण रेल्वेही हाऊसफुल झाली आहे. एसटीचाही आधार न मिळालेले चाकरमानी खासगी वाहने पकडून मुंबई, ठाणे, तसेच गुजरात बाजूकडे निघाले आहेत. त्यामुळे महामार्गावर वाहनांची प्रचंड गर्दी झाली आहे. कशेडी घाटाला पर्याय नसल्याने वाहनांचा भोगावपर्यंतचा प्रवास कूर्मगतीने सुरू होता.
तिकडे मुंबई-गोवा महामार्गाला उत्तम पर्याय म्हणून अलिकडे बोलबाला झालेल्या वाकण-पाली-खोपाली मार्गावरही वाहतूक कमालीच्या संथगतीने सुरू राहिल्याने प्रवासी चांगलेच त्रस्त झाले होते. जांभूळपाडा-परळी दरम्यान तीन ते चार किलोमीटरच्या अंतरात वारंवार वाहतूक कोंडी होऊन वाहनांच्या रांगा लागत होत्या. त्यातच बुजविलेल्या खड्ड्यांनी पुन्हा डोके वर काढले असल्याने व धुवांधार पाऊस यामुळे वाहने ेचालविणे चालकांसाठी आव्हान ठरत आहे. माणगावहून पाटणूस मार्गेही वाहने मोठ्या प्रमाणात आल्याने पाली शहरात वाहतूक कोंडीचे विघ्न वारंवार निर्माण होत होते.
