कोरोनाच्या पार्श्वभूमीवर ऑस्ट्रेलिया आणि दक्षिण आफ्रिका यांच्यातील कसोटी मालिका रद्द करण्यात आली आहे. याचा फायदा न्यूझीलंडला झाला असून त्यांनी जागतिक कसोटी अजिंक्यपद स्पर्धेच्या अंतिम फेरीत प्रवेश केला आहे. न्यूझीलंडची गुण सरासरी ७० टक्के इतकी असून त्यांना इतर कोणताही संघ मागे टाकू शकत नाही. त्यामुळे न्यूझीलंड हा जागतिक कसोटी अजिंक्यपद स्पर्धेची अंतिम फेरी गाठणारा पहिला संघ ठरला आहे. ५ फेब्रुवारीपासून भारत आणि इंग्लंड यांच्यातील कसोटी मालिकेला सुरुवात होणार असून या मालिकेचा विजेता संघ अंतिम फेरीत प्रवेश करू शकेल.
All to play for in the upcoming India v England series with three teams able to meet New Zealand in the final of the inaugural ICC World Test Championship!
Here’s the breakdown, assuming a full 4-Test series with no ties and no further matches involving NZ or Australia 👇 #WTC21 pic.twitter.com/TTZFkPd1Ex
— ICC (@ICC) February 2, 2021
भारताचा संघ अव्वल स्थानावर
‘न्यूझीलंडने पहिल्या आयसीसी जागतिक अजिंक्यपद स्पर्धेची अंतिम फेरी गाठली आहे. त्यामुळे भारत विरुद्ध इंग्लंड कसोटी मालिकेचे महत्व वाढले आहे. भारत, इंग्लंड आणि ऑस्ट्रेलिया या तीन संघांना अंतिम फेरी गाठण्याची संधी आहे,’ असे आयसीसीने ट्विट केले. जागतिक कसोटी अजिंक्यपद स्पर्धेत न्यूझीलंडचा संघ दुसऱ्या स्थानावर असून त्यांची गुण सरासरी ७० टक्के इतकी आहे. भारताचा संघ या गुणतक्त्यात अव्वल स्थानावर आहे. भारताची गुण सरासरी ७१.७ टक्के इतकी आहे. मात्र, इंग्लंडविरुद्धचे कसोटी सामने जिंकण्यात अपयश आल्यास भारताची गुण सरासरी खाली घसरेल.
ऑस्ट्रेलियाचा दक्षिण आफ्रिका दौरा रद्द
दक्षिण आफ्रिकेमध्ये कोरोनाचा प्रादुर्भाव वाढताना दिसत आहे. याच पार्श्वभूमीवर, ऑस्ट्रेलियन क्रिकेट संघाने आगामी दक्षिण आफ्रिका दौरा रद्द करण्याचा निर्णय घेतला आहे. ऑस्ट्रेलिया आणि दक्षिण आफ्रिका यांच्यात तीन सामन्यांची कसोटी मालिका पार पडणार होती. या मालिकेसाठी ऑस्ट्रेलियाने आपला संघही जाहीर केला होता. परंतु, दक्षिण आफ्रिकेत कोरोना रुग्णांची संख्या दिवसेंदिवस वाढत असल्याने ऑस्ट्रेलियाने हा दौरा रद्द केला आहे. याचा फायदा न्यूझीलंडला झाला.
