भारतीय हॉकीसाठी गुरुवारचा दिवस ऐतिहासिक ठरला. भारतीय पुरुष हॉकी संघाने तब्बल ४१ वर्षांनंतर ऑलिम्पिकमध्ये पदक जिंकण्याची कामगिरी केली. टोकियो ऑलिम्पिकमध्ये कांस्यपदकासाठी झालेल्या लढतीत भारताने जर्मनीला ५-४ असे पराभूत केले. भारतीय संघ या लढतीत पिछाडीवर पडला होता. परंतु, दमदार पुनरागमन करत भारताला हा सामना जिंकत कांस्यपदक पटकावण्यात यश आले. या ऐतिहासिक यशानंतर भारतीय पुरुष हॉकी संघावर देशभरातून कौतुकाचा वर्षाव झाला. तसेच पंतप्रधान नरेंद्र मोदी यांनी भारताचा कर्णधार मनप्रीत सिंग आणि प्रशिक्षक ग्रॅहम रीड यांना फोन करून विशेष अभिनंदन केले.
संपूर्ण देश खूप आनंदात आहे
कर्णधार मनप्रीतने फोन स्पीकरवर ठेवत मोदींना नमस्कार म्हटले. मोदी यांनी दुसऱ्या बाजूने हिंदीतून मनप्रीतचे अभिनंदन केले. ‘बहुत, बहुत, बहुत बधाईया (खूप शुभेच्छा),’ असे मोदी म्हणाले. तुझे आणि संपूर्ण हॉकी संघाचे खूप अभिनंदन. देशाला तुमच्या यशाने आनंद झाला आहे. तुम्हाला तुमच्या मेहनतीचे फळ मिळाले. तुम्ही खूप परिश्रम केले आहेत, माझ्याकडून संपूर्ण संघाला अभिनंदन सांग. संपूर्ण देश खूप आनंदात आहे, असेही मोदी म्हणाले. तसेच त्यांनी प्रशिक्षक रीड यांच्याशीही संवाद साधला. ‘प्रशिक्षक रीड तुमचे अभिनंदन. तुम्ही इतिहास रचला आहे. माझ्या शुभेच्छा तुमच्या सोबत आहेत,’ असे मोदींनी म्हटले.
#WATCH | PM Narendra Modi speaks to the India Hockey team Captain Manpreet Singh, coach Graham Reid and assistant coach Piyush Dubey after the team won #Bronze medal in men’s hockey match against Germany#TokyoOlympics pic.twitter.com/NguuwSISsV
— ANI (@ANI) August 5, 2021
भारतीय संघाची उत्कृष्ट कामगिरी
भारतीय पुरुष हॉकी संघाने १९८० सालच्या मॉस्को ऑलिम्पिकमध्ये सुवर्णपदक जिंकले होते. त्यानंतरच्या ४१ वर्षांत भारताला एकही पदक जिंकता आले नव्हते. परंतु, यंदा भारतीय संघाने उत्कृष्ट कामगिरी केली. कांस्यपदकाच्या लढतीत भारतीय संघ १-३ असा पिछाडीवर पडला होता. त्यानंतर मात्र दमदार पुनरागमन करत भारताने हा सामना ५-४ असा जिंकला.