कल्याण । टाटा टेक्नॉलॉजी कंपनीच्या माध्यमातून कल्याण आणि अंबरनाथमध्ये टाटा कौशल्य वर्धन केंद्रे सुरू करण्याचे नियोजन करण्यात आले आहे. या महत्त्वाकांक्षी प्रकल्पामुळे विद्यार्थ्यांना रोजगार तर मिळेलच, शिवाय लघु आणि सूक्ष्म उद्योगांनाही फायदा होणार आहे. कल्याणचे खासदार डॉ.श्रीकांत शिंदे म्हणाले की, टाटा टेक्नॉलॉजी लिमिटेड पुणे आणि महाराष्ट्र शासनाचा उद्योग विभाग यांच्यात टाटा कौशल्यवर्धन केंद्राच्या बांधकामासाठी करार करण्यात येणार आहे. या दोन केंद्रांच्या उभारणीसाठी 192 कोटी रुपये खर्च येणार असून, यामध्ये टाटा टेक्नॉलॉजी महत्त्वाची भूमिका बजावत आहे. याशिवाय या केंद्रांच्या माध्यमातून विद्यार्थ्यांना औद्योगिक प्रशिक्षण मिळणार असून रोजगाराच्या संधीही उपलब्ध होणार आहेत. यासाठी टाटा टेक्नॉलॉजी लिमिटेडचे सर्वेक्षक रतन टाटा यांचे महत्त्वाचे सहकार्य लाभले आहे. या प्रकल्पासाठी टाटा टेक्नॉलॉजी लिमिटेड, पुणेचे प्रतिनिधी सुशील कुमार यांनी प्रकल्प तयार करण्यास संमती दिली आहे.
दरवर्षी सात हजार विद्यार्थ्यांना प्रशिक्षण
दरवर्षी या केंद्राच्या माध्यमातून कल्याण-अंबरनाथ आणि परिसरातील सात हजार विद्यार्थ्यांना प्रशिक्षण देण्यात येणार आहे. त्यामुळे औद्योगिक क्षेत्रातील खासगी कंपन्यांमध्ये रोजगाराच्या संधी उपलब्ध होतील. या प्रकल्पाचा विद्यार्थ्यांना तसेच शहरातील सूक्ष्म, लघु आणि मध्यम उद्योगांना फायदा होणार आहे. तसेच प्रगत प्रशिक्षण दिल्यास मोठ्या प्रमाणावर रोजगार निर्मिती होईल.
