देशभरात पेट्रोल आणि डिझेलच्या किंमती गगनाला भिडल्या आहेत. दिल्ली आणि मुंबईसह देशातील अनेक बड्या शहरांमध्ये पेट्रोलची किंमत शंभरी पार गेली आहे. सोमवारी पेट्रोल-डिझेलच्या किंमती संदर्भात देशातील संसदेत अशाच काही बाबी सरकारने सादर केल्या ज्या जाणून तुम्हालाही धक्का बसेल.
६३ वेळा वाढल्या पेट्रोल-डिझेलच्या किंमती
लोकसभेत पेट्रोलियम मंत्रालयाने दिलेल्या लेखी उत्तरानुसार यावर्षी आतापर्यंत पेट्रोलच्या किंमतीत ६३ वाढ करण्यात आली आहे, तर किंमत केवळ चार वेळा कमी करण्यात आली आहे. १ जानेवारी ते ९ जुलै या कालावधीत सरकारने हा आकडा सादर केला आहे. पेट्रोलबद्दल बोलायचं झालं तर गेले १२३ दिवस किंमतीत कोणताही बदल झाला नाही.
डिझेलच्या किंमतीत ६१ दिवस वाढ
डिझेलच्या किंमती ६१ दिवस वाढवण्यात आल्या. तर फक्त ४ दिवस फक्त किंमत कमी करण्यात आली. गेल्या तीन वर्षांबद्दल जर बोलायचं झालं तर पेट्रोलच्या किंमती २०१८-१९ काळात १४८ वेळा, २०१९-२० मध्ये ८९ वेळा आणि २०२०-२१ मध्ये ७६ वेळा वाढविण्यात आल्या. त्याचप्रमाणे २०१८-१९ मध्ये डिझेलचे दर १४० वेळा, २०१९-२० मध्ये ७९ वेळा आणि २०२०-२१ दरम्यान ७३ वेळा वाढविण्यात आले.
एक्साईज करातून बंपर कमाई
आणखी एक धक्कादायक माहिती केंद्र सरकारच्या पेट्रोलियम उत्पादनांवर, विशेषत: पेट्रोल आणि डिझेलवर आकारल्या जाणाऱ्या उत्पादन शुल्काच्या उत्पन्नाशी संबंधित समोर आली आहे. जर आपण मागील तीन वर्षात सरकारच्या मिळकतीची तुलना केली तर (२०२०-२१) मध्ये प्रचंड वाढ झाली आहे. २०१८-१९ मध्ये सरकारने उत्पादन शुल्कातून २,३५,३०१ कोटी रुपये कमावले, त्यापैकी सुमारे २,१३,००० कोटी रुपये फक्त पेट्रोल आणि डिझेलवरील करातून आले. त्याचबरोबर २०१९-२० मध्ये १,९७,८४५ कोटी रुपये उत्पन्न मिळालं. २०२०-२१ मध्ये सरकारच्या उत्पन्नात प्रचंड वाढ झाली. ३,४४,७४६ कोटी एवढं उत्पन्न होतं. यात सुमारे ३,३४,००० कोटी रुपये पेट्रोल व डिझेलवरील उत्पादन शुल्कातून आले.