तेल अवीव: हमास आणि इस्रायलमध्ये सुरू असलेल्या युद्धाला एक आठवडा उलटून गेला आहे. दरम्यान, इस्रायली संरक्षण दलाने शनिवारी मोठा दावा केला असून, गाझा पट्टीमध्ये रात्रभर केलेल्या हवाई हल्ल्यात त्यांनी हमास या दहशतवादी गटातील म्होरक्याचा खात्मा केला आहे. टाईम्स ऑफ इस्रायलच्या वृत्तानुसार, इस्रायलच्या संरक्षण दलाने दावा केला आहे की, हमासच्या हवाई गटाचा प्रमुख अबू मुराद हवाई हल्ल्यात ठार झाला आहे. इस्रायली संरक्षण दलाने एका मुख्यालयावर हल्ला केला जिथून दहशतवादी गट त्याच्या हवाई हालचालींवर नियंत्रण ठेवत होता. (Israel Vs Hamas Big blow to Hamas Leader Killed in Israeli Attack The IDF )
इस्रायलच्या टाइम्सने म्हटले आहे की, गेल्या आठवड्यात इस्रायलवर हमासच्या हल्ल्यात अबू मुरादने अतिरेक्यांना निर्देशित करण्यात मोठी भूमिका बजावली होती, ज्यामध्ये हमासचे सैनिक हँग ग्लायडरद्वारे इस्रायलमध्ये घुसले होते. IDF ने सांगितले की त्यांनी 7 ऑक्टोबर रोजी इस्रायलमध्ये घुसखोरी करणार्‍या हमास कमांडो सैन्याच्या डझनभर ठिकाणांवर हल्ले केले.
आतापर्यंत जवळपास ३ हजार लोकांचा मृत्यू
7 ऑक्टोबर रोजी हमासने इस्रायलवर मोठ्या प्रमाणात हल्ले केले ज्यात शेकडो लोक मारले गेले. तेव्हापासून, हल्ल्यांमध्ये इस्रायलमध्ये 1,300 हून अधिक लोक मारले गेले आहेत तर इस्रायली प्रत्युत्तराच्या हवाई हल्ल्यांमध्ये गाझामध्ये 1,530 हून अधिक लोक मारले गेले आहेत. इस्रायलमध्ये हमासचे सुमारे 1,500 दहशतवादी मारले गेल्याचा दावा इस्रायलने केला आहे.
शुक्रवारी इस्रायलने गाझामध्ये राहणाऱ्या लोकांना 24 तासांच्या आत गाझा सोडण्याचे आदेश दिले होते. इस्रायल हमासच्या ठिकाणांवर सातत्याने बॉम्बफेक करत आहे. युनायटेड नेशन्सच्या म्हणण्यानुसार, पट्टीच्या दक्षिणेकडील भागात 4 लाखांहून अधिक गाझा वासियांना हलवण्यात आले आहे. इस्रायली लष्कर आता गाझामध्ये सर्व बाजूंनी जमिनीवर कारवाई करण्याच्या तयारीत आहे.
आयडीएफने पुष्टी केली आहे की गाझामध्ये 120 हून अधिक नागरिक अजूनही हमासच्या सैनिकांच्या ताब्यात आहेत. अशा स्थितीत इस्रायलसमोरील खरे आव्हान आहे ते पकडलेल्या नागरिकांची सुरक्षित सुटका करणे. इस्रायली लष्कराचे (IDF) ‘ऑपरेशन स्वॉर्ड्स ऑफ आयर्न’ हे गाझामध्ये लष्कराने केलेल्या पूर्वीच्या कोणत्याही कारवाईपेक्षा अधिक महत्त्वाकांक्षी असल्याचे दिसते.
इस्रायली रणगाडे गाझा पट्टीच्या प्रवेशद्वारापर्यंत पोहोचले
गाझामधील दक्षिण सीमेवर इस्रायली रणगाडे आणि चिलखती वाहने पोहोचली आहेत. गाझा पट्टीच्या आत इस्रायलचा आधुनिक युद्ध रणगाडा ‘मेरकावा’ आघाडीवर असून पायदळ बख्तरबंद वाहनांसह लष्कराचे यांत्रिकी सैन्य युद्धासाठी सज्ज आहे. गाझामधील सर्व महत्त्वाच्या भागांवर कब्जा करून हमासचा खात्मा करणे हे इस्रायली लष्कराचे ध्येय आहे. हमासचे बोगद्याचे जाळे उद्ध्वस्त करण्यासाठी मोठ्या प्रमाणात बुलडोझर, अर्थ मूव्हर्स आणि इतर कर्मचारीही तयार केले जात आहेत.
हे रणगाडे केवळ दक्षिण सीमेवरच नव्हे तर गाझाच्या उत्तर सीमेवरही तैनात करण्यात आले आहेत. ऑर्डर मिळताच ते गाझामध्ये प्रवेश करण्यास तयार आहे. गाझासारख्या दाट लोकवस्तीच्या भागात लष्करी कारवाई करताना अनेक समस्या निर्माण होऊ शकतात. 2014 मध्ये, गाझामधील इस्रायली पायदळ बटालियनला टँकविरोधी माइन्स, स्निपर आणि अॅम्बुशसमुळे मोठ्या प्रमाणात नुकसान झाले आणि गाझा शहराच्या उत्तरेकडील लढाईत शेकडो नागरिक मारले गेले.
(हेही वाचा: Israel Hamas War : लंडनमधील ज्यूंच्या शाळा बंद ठेवणार; युद्धाच्या पार्श्वभूमीवर घेतला निर्णय )
