ठाणे । ठाणे महापालिकेच्या स्वत:च्या योजनेच्या आणि मे. स्टेम प्राधिकरणाकडून शुक्रवारी 19 जानेवारी सकाळी 9.00 वाजल्यापासून ते शनिवार 20 जानेवारी असा 24 तासांचा शटडाऊन घेण्यात येणार आहे. या शटडाऊन कालावधीत निगा देखभाल आणि दुरूस्तीमधील अत्यावश्यक कामे, टेमघर जलशुद्धीकरण केंद्र नवीन मोटर कंट्रोल पॅनल बसविणे आणि कळवा प्रभाग समिती अंतर्गत मुख्य जलवाहिनीवर कनेक्शन करणे इत्यादी तातडीची कामे हाती घेण्यात येणार आहेत.
त्या अनुषंगाने ठाणे शहरातील घोडबंदर रोड, लोकमान्यनगर, वर्तकनगर, साकेत, ऋतुपार्क, जेल, गांधीनगर, रुस्तमजी, सिध्दांचल, इंदिरानगर, रुपादेवी, श्रीनगर, समतानगर, सिद्धेश्वर, इटर्निटी, जॉन्सन, मुंब्रा आणि कळव्याच्या काही भागातील पाणीपुरवठा 24 तासांसाठी बंद राहणार असल्याचे ठाणे महापालिकेच्या वतीने कळवण्यात आले आहे. शटडाऊनमुळे पाणीपुरवठा पूर्व पदावर येईपर्यंत पुढील 1 ते 2 दिवस कमी दाबाने पाणीपुरवठा होण्याची शक्यता आहे. तरी नागरिकांनी पिण्याच्या पाण्याचा योग्य तो साठा करुन ठेवावा आणि महानगरपालिकेस सहकार्य करावे असे आवाहन पालिकेतर्फे करण्यात आले आहे.
