उत्तर प्रदेशातील अयोध्येत ७२ व्या प्रजासत्ताक दिनानिमित्त तिरंगा फडकवून आणि झाडे लावून मशिदीच्या औपचारिक कामाचा श्रीगणेशा करण्यात आला. २०१९ च्या सर्वोच्च न्यायालयाच्या निर्णयानंतर रामजन्मभूमीतील अयोध्या मंदिराच्या मान्यतेसह त्याच जिल्ह्यात मशीद तयार करण्यास देखील मान्यता देण्यात आली. इंडो-इस्लामिक कल्चरल फाउंडेशन ट्रस्ट अयोध्येतील धन्नीपूर गावात पाच एकर जागेवर मशिदी उभारणार आहे. त्याचा पाया प्रजासत्ताकदिनी सकाळी ८.१५ वाजता रचन्यात आला. हे गाव रामजन्मभूमीपासून सुमारे २५ किलोमीटर अंतरावर असून जिथे भगवान रामाचे मंदिर उभारण्यात येत आहे. याठिकाणी ट्रस्टचे प्रमुख जफर अहमद फारूकी यांच्या हस्ते सकाळी साडेआठ वाजेच्यादरम्यान ध्वजारोहण करण्यात आले. त्यानंतर, ट्रस्टच्या सर्व १२ सदस्यांनी तेथे रोपे लावून माशिदीचे औपचारिक काम सुरू केले.
‘आम्ही त्या ठिकाणी असणाऱ्या मातीच्या परीक्षणाचे काम सुरू केले आहे. एकदा मातीच्या परीक्षणाचा अहवाल आला आणि नकाशा पास झाला की, बांधकामास सुरूवात होईल. मशिदीच्या बांधकामासाठी देणगी देण्याची विनंती केली आहे आणि लोक बांधकामासाठीच्या निधीमध्ये हातभार लावत आहेत, असे ट्रस्टचे प्रमुख जफर अहमद फारूकी यांनी सांगितले.
