कर्मचारी भविष्य निर्वाह निधी संस्थेने (ईपीएफओ) वित्त वर्ष २०२०-२१ च्या व्याजदरासंदर्भातील मोठी घोषणा केली आहे. कर्मचारी भविष्य निर्वाह निधीचे व्यवस्थापन पाहणार्‍या संघटनेच्या केंद्रीय विश्वस्त मंडळाने व्याजदर ८.५० टक्के राहणार असल्याची घोषणा केली आहे. म्हणजेच व्याजदरामध्ये कोणताही बदल करण्यात आलेला नाही. वित्त वर्ष २०१९-२० मध्येही ईपीएफओच्या निधीवर ८.५० टक्के व्याज देण्यात येत होते.
वित्त वर्ष २०१९-२० मधील वार्षिक ८.५० टक्क्यांच्या तुलनेत चालू वर्षातील व्याजदरात कपात होण्याची शक्यता वर्तवली जात होती. कोरोना तसेच लॉकडाऊनमुळे आर्थिक चणचणीतील संघटनेच्या अनेक सदस्यांनी निधीतील रक्कम काढून घेण्याचे तसेच कमी योगदान देण्याचे धोरण अनुसरल्याने सरकारला अधिक व्याज देणे शक्य होणार नसल्याच्या चर्चा होत्या. मात्र, या सर्व चर्चा चुकीचे असल्याचे आजच्या निर्णयावरून स्पष्ट झाले आहे. ईपीएफओचा हा निर्णय सर्वसामान्यांना दिलासा देणारा असल्याचे सांगण्यात येत आहे.
कर्मचारी भविष्य निर्वाह निधी संघटनेने वर्ष २०१८-१९ मधील ८.६५ टक्क्यांवरून पुढील वित्त वर्षात दर कमी करत ते सात वर्षांच्या तळात आणून ठेवले होते. यापूर्वी, २०१२-१३ मध्ये दर ८.५० टक्के असे किमान होते. तुलनेत २०१६-१७ मध्ये ८.६५ टक्के, २०१७-१८ मध्ये ८.५५ टक्के, २०१५-१६ मध्ये ८.८० टक्के असे अधिक होते. यंदा हा दर ८.५० टक्के राहणार असून कोरोना आणि लॉकडाऊननंतरही यामध्ये कोणताही बदल करण्यात आलेला नाही. श्रीनगरमध्ये पार पडलेल्या बैठकीनंतर या निर्णयाची घोषणा करण्यात आली आहे.
