राष्ट्रवादी काँग्रेसचे ज्येष्ठ नेते एकनाथ खडसे यांना भोसरी जमीन घोटाळा प्रकरमात मोठा दणका बसला आहे. पुण्यातील भोसरी जमीन घोटाळा प्रकरणी खडसेंचे जावई गिरीश चौधरी यांना ईडीने अटक केली आहे. गिरीश चौधरी यांची या प्रकरणी मंगळवारी कसून चौकशी करण्यात आली. तब्बल १३ तास चौकशी केल्यानंतर ईडीने गिरीश चौधरी यांना ताब्यात घेतलं. ईडीला सिडी लावण्याचा इशारा देणाऱ्या एकनाथ खडसे यांना सर्वात मोठा धक्का मानला जात आहे.
या प्रकरणी जानेवारी महिन्यात एकनाथ खडसे यांची ईडीने चौकशी केली होती. खडसे यांची मुलगी शारदा यांनादेखील ईडीने चौकशीला बोलावलं होतं. यानंतर त्यांचे जावई गिरीश चौधरी यांना चौकशीसाठी बोलावलं होतं. काल दिवसभर गिरीश चौधरी यांची चौकशी करण्यात आली. त्यानंतर त्यांना ईडीने अटक केली आहे.
NCP leader Eknath Khadse’s son-in-law was arrested in the Pune land deal case yesterday. He was called for questioning and later placed under arrest: Enforcement Directorate
— ANI (@ANI) July 7, 2021
काय आहे प्रकरण?
फडणवीस सरकारमध्ये एकनाथ खडसे महसूल मंत्री असताना त्यांनी पुण्यातील भोसरी येथे ३.१ एकर एमआयडीसी प्लॉट खरेदी करण्यासाठी आपल्या पदाचा गैरवापर केल्याचा आरोप २०१६ मध्ये झाला होता. ३१ कोटी रुपयांची किंमत असलेल्या या भूखंडाची निव्वळ ३.७५ कोटी रुपयांना विक्री झाल्याचा दावा केला गेला होता. रेडी रेकनर दरापेक्षा खूपच कमी बाजारमूल्य दाखवून जमिनीची खरेदी झाल्याचा आरोप आहे.