देशातील पहिले महिला विद्यापीठ म्हणून मान मिळालेल्या एसएनडीटी विद्यापीठाचा 69 वा दीक्षांत समारंभ 18 जानेवारीला सकाळी 11 वाजता होणार आहे. दीक्षांत समारंभात 13 हजार 904 विद्यार्थिनींना पदवी व पदविका प्रदान करण्यात येणार आहे. विद्यापीठाच्या चर्चगेट येथील कॅम्पसमधील सर सीतााम तथा लेडी शांताबाई पाटकर दीक्षांत सभागृहात होणार आहे.
एसएनडीटी विद्यापीठाच्या दीक्षांत समारंभाला राज्यपाल व विद्यापीठाचे कुलपती भगतसिंह कोश्यारी अध्यक्ष म्हणून उपस्थित राहणार आहेत. सामाजिक उद्योजक आणि उद्यमिता विद्यापीठ, जे.पी. फाऊंडेशन ऑफ सोशलवर्कच्या संस्थापक -संचालिका डॉ. नंदिता पाठक या प्रमुख अतिथी असतील. पदवी व पदविका प्रदान करण्यात येणार्‍या विद्यार्थिनींनीमध्ये स्नातक पदवीचे प्रमाण सर्वाधिक 11हजार 197 असून, त्याखालोखाल पदवी 2 हजार 167, पदव्युत्तर-पदविका 149, डिप्लोमा किंवा प्रमाणपत्र 325 आणि पीएचडीच्या 66 विद्यार्थिनी आहेत. त्याचबरोबर 120 विजेत्यांमध्ये 62 सुवर्णपदके व 86 बक्षिसे देण्यात येतील. समारंभात चार विद्याशाखांतर्गत 143 पदवी आणि पदविका प्रदान करण्यात येईल.
यावेळी एसएनडीटी विद्यापीठातर्फे राष्ट्रसेविका समितीच्या प्रमिला मेढे व सुप्रसिद्ध लेखिका व कवयित्री डॉ. अरुणा ढेरे यांना डॉक्टर ऑफ लेटर्स (हॉनोरिस कोर्स) पदवी प्रदान करण्यात येणार आहे. यावेळी विद्यापीठाचे प्र-कुलगुरू विष्णू मगरे हे उपस्थित राहणार आहेत. समारंभाचे थेट प्रक्षेपण www.estv.in/sndt या संकेतस्थळावर होणार आहे.
पीएचडी मिळवणार्‍या विद्यार्थिनींच्या संख्येत वाढ
विद्यापीठाने भाऊबीज योजनेअंतर्गत 16 लाख 60 हजारांचा निधी उभारला आहे. त्यातून 2018-19 मध्ये 10 विद्यार्थिनींना मदत केली आहे. विद्यापीठाला संशोधन आणि फेलोशिप किंवा यूजीसी, आयएसीएसएसआर अशा संस्थांकडून 7 लाख 72 हजार 811 इतका निधी मिळाला आहे. गतवर्षीच्या तुलनेत यावर्षी पीएचडी पदवी मिळवणार्‍या विद्यार्थिनींच्या संख्येत दुपटीने वाढ झाली आहे.
