आपला देश बहुतांशी गावांमध्ये वसतो. भली मोठी शहरे विकसित झाली असली तरी त्यांची पोटे गावांमुळेच भरली जातात कारण आपल्या कृषिप्रधान देशातील तीन चथुर्तांश जनता शेती करते. शहरांमध्ये आयुष्य व्यतीत करणारे बरेचजण पहिला मौका मिळताच आपल्या गावी जातात, मनःशांती मिळवायला. खरंतर काँक्रीट जंगलामध्ये राहिल्यावर गावाकडच्या हिरवळीची ओढ अजूनच वाढते. त्यातच जे परदेशात स्थायिक झालेत त्यांना तर आपला देश, आपलं गाव नेहमीच खुणावत असतं. तिथल्या आठवणी तिथेच जन्मलेल्या आपल्या मुलांना सांगत ते आपल्या मनाला शांत ठेवण्याचा प्रयत्न करीत असतात. पालकांच्या डोळ्यात दिसणारे गावाचे प्रेम पाल्यांना नक्कीच गावाला भेट देण्यासाठी खुणावत असतं. अशाच एकाची गोष्ट ‘सावधान, पुढे गाव आहे’ या चित्रपटातून सांगण्यात आली आहे.
काय आहे पोस्टरमध्ये
केवळ एक गोष्ट नाही तर चित्रपटातून एक सामाजिक संदेशही देण्यात आला आहे. प्रवास करताना शक्यतो प्रत्येकालाच ‘सावधान, पुढे गाव आहे’ अशी पाटी दिसलीच असेल. नुकतेच या चित्रपटाचे पोस्टर सोशलमिडीयावर प्रदर्शित करण्यात आलं आहे. या चित्रपटाच्या पोस्टरवर ‘सावधान, पुढे गाव आहे’ या पाटीवर गिधाड बसलेले आढळून येते. त्यामुळे चित्रपटाच्या विषयात गूढताही असण्याची शक्यता आहे.
‘सावधान, पुढे गाव आहे’ या चित्रपटाचे दिग्दर्शन मुन्नावर शमीम भगत यांनी केले आहे. त्याची प्रस्तुती मीना शमीम फिल्म्सची आहे. चित्रपटातील कलाकारांची नावे गुलदस्त्यात ठेवण्यात आली आहेत. एका अनोख्या विषयावरील ‘सावधान, पुढे गाव आहे’ मध्ये रहस्य आणि उत्कंठा यांचे मिश्रण असणार आहे. लवकरच हा चित्रपट प्रेक्षकांच्या भेटीला येणार आहे.
