कोरोना विषाणूच्या संसर्गामुळे जगभरात अजूनही भितीचे वातावरण आहे. आजारपण कोरोना महामारी आणि मृत्यू यांच्यादरम्यान हजारो लोक आपल्या नोकर्‍या गमावत आहेत. बेरोजगारीचा दर जवळजवळ प्रत्येक देशात उच्च स्तरावर आहे. या भीतीच्या पोटी लोक आपापल्या देशात परत जात आहेत. भारत सरकार ‘वंदे भारत मिशन’ अंतर्गत परदेशात अडकलेल्या नागरिकांना परत आणत आहे. या विमानासाठी लोकांना पैसे मोजावे लागतात, परंतु संयुक्त अरब अमिराती (युएई) मध्ये, शारजाह येथे असलेल्या कंपनीने आपल्या १२० कर्मचार्‍यांना चार्टर्ड फ्लाइट्सने भारतात पाठवून सर्वच कर्मचाऱ्यांची मने जिंकली आहेत.
अॅडव्हान्स पगारासह भेटवस्तू देखील…
इंग्रजी वृत्तपत्र हिंदुस्तान टाईम्सने दिलेल्या वृत्तानुसार,आर हरिकुमार शारजाहमध्ये आपली कंपनी चालवतात. रविवारी त्यांचे १२० कर्मचारी केरळला सुखरूप परतले आहेत. त्याने केवळ चार्टर्ड फ्लाइटद्वारे कर्मचार्‍यांना घरी पाठवले नाही तर त्यांना एक महिन्याचा आगाऊ पगारही दिला असल्याचे समजते आहे. तसेच त्यांनी प्रत्येक कर्मचार्‍यांला भेट वस्तूही दिले आहे. याशिवाय कर्मचार्‍यांना असेही सांगण्यात आले की, जर त्यांना पुन्हा शारजाहला यायचे नसेल तर ते कोयंबटूरमधील कंपनीच्या दुसर्‍या युनिटमध्ये कामही करू शकतात.
या चार्टर्ड फ्लाइटमध्ये आर हरिकुमारच्या कंपनीतील लोकच नव्हते तर शारजाहमध्ये नोकरी गमावलेल्या आणि भारतात परत जाण्याची इच्छा असणाऱ्या ५० लोकांनाही त्यांनी विमानात स्थान दिले. हरिकुमार म्हणाले की, कर्मचार्‍यांना घरी पाठविणे ही माझी जबाबदारी आहे, कारण ते माझ्या चांगल्या आणि कठीण काळात माझ्यासोबत होते.
कर्मचाऱ्यांना मदत करणं कंपनीची जबाबदारी
हरिकुमार यांची कंपनी अ‍ॅल्युमिनियमसंदर्भात काम करते. त्याच्या कंपनीत १२०० कर्मचारी काम करतात. २० वर्षांपूर्वी ते नोकरीच्या शोधात केरळमधील अल्लापुजा येथून संयुक्त अरब अमिरातीमध्ये आले होते. नंतर त्याने स्वत: ची कंपनी उघडली. हरिकुमार म्हणाले, ‘चांगला व्यवसाय हा कुटूंबासारखा असतो. जर त्यांचे कर्मचारी अडचणीत असतील तर त्यांना मदत करण्याची जबाबदारी कंपनीची आहे. ‘ कोरोना व्हायरसमुळे तेथे अडकलेल्या आणखी काही भारतीय नागरिकांना ते सुखरूप परत पाठवणार असल्याचेही त्यांनी सांगितले.
