Coronavirus Update: आज राज्यात १४२ कोरोना मृत्यू, तर ३८२७ नव्या रुग्णांची नोंद

गेल्या काही दिवसांपासून राज्यात कोरोनामुळे होणाऱ्या मृतांचा आकडा वाढू लागला असून आज दिवसभरात तब्बल १४२ रुग्णांचा मृत्यू झाला आहे. त्यामुळे कोरोनामुळे राज्यात मृत्यू झालेल्या रुग्णांचा एकूण आकडा आता ५ हजार ८९३ इतका झाला आहे. यासोबतच रुग्णांचा आकडा देखील वाढत असून आज दिवसभरात ३ हजार ८२७ नवे कोरोना रुग्ण सापडले आहेत. त्यामुळे राज्यातल्या एकूण कोरोनाग्रस्त रुग्णांचा आकडा १ लाख २४ हजार ३३१ इतका झाला असून त्यापैकी ५५ हजार ६५१ रुग्ण अॅक्टिव्ह आहेत. तर ६२ हजार ७७३ रुग्ण बरे होऊन घरी परतले आहेत. आज दिवसभरात १९३५ रुग्ण बरे होऊन घरी परतले आहेत.

कोरोनाबाधितांची सविस्तर आकडेवारी

आज नोंद झालेल्या मृत्यूंपैकी ८९ पुरुष तर ५३ महिला आहेत. आज नोंद झालेल्या १४२ मृत्यूपैकी ६० वर्षे किंवा त्यावरील ७४ रुग्ण आहेत तर ५७ रुग्ण हे वय वर्षे ४० ते ५९ या वयोगटातील आहेत. तर ११ जण ४० वर्षांखालील आहे. कोविड१९ मुळे राज्यात झालेल्या मृत्यूंची संख्या आता ५८९३ झाली आहे.