तरसाळी – बागलाण तालुक्यातील वटार येथील सावतावाडी वस्तीत धुमाकूळ घालत दररोज जनावरांची शिकार करणाऱ्या बिबट्याला अखेर वनविभागाने जेरबंद केलं. गेल्या एक महिन्यापासून हा बिबट्या दररोज शेतकऱ्यांच्या दुभत्या जनावरांचा बळी घेत होता. मात्र, अखेर वनविभागाने लावलेल्या पिंजऱ्यात बकरी खाण्याच्या नादात हा बिबट्या अडकला.
गेल्या चार ते पाच महिन्यांपासून या भागात बिबट्यांची दहशत कायम आहे. त्यातच काही दिवसांपासून एका बिबट्याने मोठी दहशत निर्माण केली होती. मेंढपाळांच्या मेंढ्या उचलून नेणाऱ्या या बिबट्याने भरदिवसा अनेकदा शेतकऱ्यांना दर्शन दिलं होतं. वनविभागाने बिबट्याला पकडण्यासाठी बरेच प्रयत्न केले, मात्र, बिबट्या हुलकावणी देत होता. हा बिबट्या अखेर पिंजऱ्यात जेरबंद झाल्याने शेतकऱ्यांनी सुटकेचा निश्वास सोडलाय. बिबट्याला नैसर्गिक अधिवासात सोडणार असल्याची माहिती तालुका वनपरिक्षेत्र अधिकारी प्रशांत खैरनार यांनी दिली. गेल्या २८ तारखेला या बिबट्याने वामन दशरथ बागूल यांच्या राहत्या घराजवळ त्यांचा चार वर्षीय नातू कार्तिकवर हल्ला केला होता.
