पुणे कालवा फुटीप्रकरणी अहवाल १५ डिसेंबरपर्यंत!

पुणे कालवा फुटल्या प्रकरणी केबल कंपन्यांना नोटीस पाठवण्यात आली आहे. या केबल कंपन्यांनी कालव्याशेजारी अनधिकृतपणे केबल्स टाकल्या होत्या. या कंपन्यांच्याविरोधात ग्राहकांनी तक्रार दाखल केली होती. कालवा फुटल्याप्रकरणी जलसंपदा विभागाने अनधिकृत केबल टाकलेल्या सर्व केबल कंपन्यांना नोटीसा बजावल्या आहेत. कंपन्यांची माहिती गोळा करून त्यांच्यावर कारवाई करण्यात येईल अशी माहिती जलसंपदा विभागाची दिली आहे.

पुण्यामध्ये २७ सप्टेंबरला खडकवासला धरणातून पुणे शहराला आणि जिल्ह्याला पाणी पुरवठा करणारा मुठा नदीचा उजवा कालवा फुटला होता. सिंहगड रस्त्यावर दांडेकर पुजाजवळ ही घटना घडली. सकाळी सव्वा अकराच्या दरम्यान कालवा फुटला त्यानंतर दांडेकर पूल परिसरामध्ये पाणीच पाणी झाले होते. दांडेकर पूल परिसरातील रस्त्यांला नदीचे स्वरूप आले होते. कालवा फुटल्याने रस्त्यावरील अनेक वाहने वाहून गेली होती. तसंच झोपडपट्टी परिसरामध्ये मोठ्याप्रमाणात पाणी शिरल्याने नागरिकांच्या घरातील सामान वाहून गेले आणि घरांचे नुकसान झाले.