राज्यात दिवसेंदिवस कोरोना व्हायरस फैलाव वाढत आहे. कोरोना व्हायरसचा प्रादुर्भाव रोखण्यासाठी राज्य आणि देशपातळीवर अनेक उपाययोजना केल्या जात आहेत. त्यासाठी अत्यावश्यक सेवेतील डॉक्टर, परिचारिका, सफाई कामगार, औषध विक्रेते, पोलीस आणि शासकीय कर्मचारी, अधिकारी यांच्याबरोबर एसटीचे कर्मचारी देखील आपला जीव धोक्यात घालून अहोरात्र सेवा करीत आहेत. त्यांच्या कार्याला प्रोत्साहन म्हणून त्यांना दररोज ३०० रुपये प्रोत्साहन भत्ता देण्यात येणार असल्याची घोषणा परिवहन मंत्री आणि एसटी महामंडळाच्या अध्यक्ष अॅड. अनिल परब यांनी आज केली.
कोरोना विषाणूमूळे राज्यात उद्धभवलेल्या गंभीर परिस्थितीतदेखील महाराष्ट्र रा. प. महामंडळाचे कर्मचारी अहोरात्र सेवा पुरवित आहेत. या सर्वांच्या कार्याची दखल घेवून सर्व संबंधीतांना प्रोत्साहन भत्ता दिला जाईल.@OfficeofUT @AjitPawarSpeaks @satejp @AUThackeray #MaharashtraFightsCorona pic.twitter.com/tT5Coy6j4W
— Anil Parab (@advanilparab) April 6, 2020
दळणवळणाची सेवा पुरविण्याची जबाबदारी एसटी महामंडळावर
परब म्हणाले, दिनांक २३ मार्च पासून पुढील तीन आठवडे संपूर्ण देशात लॉकडाऊन जाहीर करण्यात आला. या काळामध्ये अत्यावश्यक सेवा वगळता देशातील सर्व व्यवहार बंद झाले. मुंबईसारख्या महानगरांमध्ये अत्यावश्यक सेवेमध्ये कामगिरी बजावणाऱ्या कर्मचाऱ्यांना दळणवळणाची सेवा पुरविण्याची जबाबदारी शासनाने एसटी महामंडळावर टाकली. त्यानुसार २३ मार्च पासून मुंबई आणि उपनगरातील विविध ठिकाणावरून एसटीच्या बसेद्वारे दररोज अत्यावश्यक सेवेमध्ये कामगिरी बजावणाऱ्या कर्मचाऱ्यांना सुखरूप घेऊन जाण्याची जबाबदारी एसटीचे कर्मचारी यशस्वीपणे पार पाडत आहेत.
कर्तव्य पार पाडत असताना मास्क आणि सॅनिटायझर देण्यात येत
दररोज एसटी कर्मचारी चालक, वाहक, यांत्रिकी, सफाई कामगार आपला स्वतःचा जीव धोक्यात घालून अहोरात्र सेवा बजावत आहेत. केवळ मुंबईतीलच नव्हे तर ठाणे, पालघर रायगड अशा विविध विभागातून एसटी कर्मचारी सध्या मुंबईत अत्यावश्यक सेवा बजावण्यासाठी कार्यरत आहेत. ज्या कर्मचाऱ्यांचे मुंबईत घर नाही, त्यांची राहण्याची, भोजनाची व्यवस्था एसटी महामंडळमार्फत करण्यात आली आहे. तसेच सगळ्या कर्मचाऱ्यांना कर्तव्य पार पाडत असताना मास्क आणि सॅनिटायझर लिक्विडची बाटली देण्यात येत आहे. त्यांच्या आरोग्याची पुरेपूर काळजी एसटी प्रशासना मार्फत घेण्यात येत आहे. या कर्तव्यदक्ष कर्मचाऱ्यांना प्रोत्साहन भत्ता देण्यात येणार आहे अशी माहिती परब यांनी दिली.
हेही वाचा – CoronaVirus: कोरोना रुग्णांसाठी रेल्वेचे ४० हजार बेड सज्ज!
