नितेश रुकेच्या अप्रतिम खेळाच्या जोरावर उपनगरच्या शिर्सेकर्स महात्मा गांधी स्पोर्ट्स अकादमीने सांगलीच्या हिंदकेसरीचा पराभव करत परळच्या विद्यार्थी क्रीडा केंद्राने आयोजित केलेल्या पुरुषांच्या राज्यस्तरीय खो-खो स्पर्धेचे अजिंक्यपद पटकावले.शिर्सेकर्स महात्मा गांधी स्पोर्ट्स अकादमी आणि हिंदकेसरी या महाराष्ट्रातील दोन अव्वल खो-खो संघातील अंतिम सामना अपेक्षेप्रमाणे उत्कंठावर्धक झाला. महात्मा गांधी अकादमीने हिंदकेसरीचे कडवे आव्हान १५-१४ असे केवळ १ गुणाने मोडून काढले.
हिंदकेसरीने नाणेफेक जिंकून प्रथम आक्रमण करण्याचा निर्णय घेतला. मध्यंतराला महात्मा अकादमीकडे ९-८ अशी एका गुणाची आघाडी होती. महात्मा अकादमीच्या नितेश रूकेने पहिल्या डावात १:५० मि. आणि दुसर्‍या डावात २ मि. संरक्षण करून सामना आपल्या संघाच्या बाजूने झुकवला. नितेशला दिपक माधव (१:४०, १:३० मि. संरक्षण), प्रतिक देवरे (१:४०, १:२० मि. संरक्षण) आणि ॠषिकेश मुर्चावडे (१, १:३० मि. संरक्षण) यांनी संरक्षणात सुरेख साथ दिली. तर, आक्रमणात ओमकार सोनावणेने ४ गडी बाद केले.
हिंदकेसरीच्या अमोल जाधव (१:२०, १:५० मि. संरक्षण आणि ३ गडी), राहुल तामगावे (१:५० मि. संरक्षण), उत्तम सावंत (२:२० मि. संरक्षण), मिलिंद चावरेकर (१:४० मि. संरक्षण आणि ३ गडी), युवराज जाधव (४ गडी) या अनुभवी खेळाडूंनी सामना आपल्या संघाच्या बाजूने फिरवण्याचा प्रयत्न केला. पण, त्यांचे प्रयत्न अपुरे पडले. ४ फूट ११ इंच गटात युवक क्रीडा मंडळ आणि यजमान विद्यार्थी क्रीडा मंडळ यांच्यातील अटीतटीच्या अंतिम सामन्यात युवकने ६-५ अशी १ गुणानी बाजी मारली.
स्पर्धेतील वैयक्तिक पारितोषिके –
सर्वोत्कृष्ट आक्रमक : ओमकार सोनावणे (शिर्सेकर्स महात्मा गांधी अकादमी)
सर्वोत्कृष्ट संरक्षक : उत्तम सावंत (हिंदकेसरी)
सर्वोत्कृष्ट अष्टपैलू : नितेश रूके (शिर्सेकर्स महात्मा गांधी अकादमी)
