टोकियो ऑलिम्पिकला २३ जुलैपासून सुरुवात होणार असून त्याआधीच ऑलिम्पिक क्रीडानगरीत (Olympic Village) कोरोनाचा शिरकाव झाला आहे. रविवारी दक्षिण आफ्रिकेच्या फुटबॉल संघातील दोन खेळाडूंचा कोरोनाचा अहवाल पॉझिटिव्ह आला होता. त्यापाठोपाठ सोमवारी चेक प्रजासत्ताकच्या व्हॉलीबॉल खेळाडूला, तसेच अमेरिकेच्या एका जिम्नॅस्टला कोरोनाची बाधा झाल्याची माहिती देण्यात आली. त्यामुळे क्रीडानगरीत कोरोनाचा धोका वाढू नये यासाठी रात्री ८ नंतर सुरु असलेल्या आणि मद्य विक्री करणाऱ्या हॉटेलमध्ये जाणे टाळा अशी सक्त ताकीद आयोजकांकडून खेळाडू, अधिकारी आणि पत्रकारांना देण्यात आली आहे.
मद्यपान करून नियमांचे उल्लंघन
टोकियो ऑलिम्पिकसाठी केवळ खेळाडूच नाही, तर अधिकारी आणि पत्रकारही परदेशातून जपानमध्ये दाखल झाले आहेत. यापैकी काही जण बाहेर जेवायला गेल्याचे, तसेच मद्यपान करून नियमांचे उल्लंघन करत असल्याची माहिती जपानी मीडियाने दिली आहे. त्यामुळे कोरोनाचा संसर्ग वाढत असल्याचे त्यांचे म्हणणे आहे. या पार्श्वभूमीवर, ऑलिम्पिक क्रीडानगरीतील व्यक्तींना रात्री ८ नंतर सुरु असलेल्या आणि मद्य विक्री करणाऱ्या हॉटेलमध्ये जाणे टाळा अशी सक्त ताकीद आयोजकांनी दिली आहे.
