निवडणूका आल्या की जनतेच्या दारात मतांचा जोगवा मागणारे अनेक पुढारी आपण आतापर्यंत पाहिले असतील. मात्र एका उमेदवाराने मतांसाठी चक्क मुलाच्या लग्नपत्रिकेचा आधार घेऊन ‘आहेर नको पण मत नक्की द्या’ असे भावनिक आवाहन लग्न पत्रिकेच्या माध्यमातून केले आहे. कोल्हापूर जिल्ह्यातल्या कागल पंचायत समितीचे उपसभापती यांनी ही पत्रिका छापली आहे. त्यांच्या मुलाच्या लग्नात येणाऱ्या वऱ्हाडी मंडळींना अशाप्रकारचे त्यांनी आवाहन केले आहे. त्यांच्या या आवाहनामुळे सगळ्यांच्याच भुवया उंचावल्या आहेत.
कागल पंचायत समितीचे उपसभापती विजय भोसले यांच्या मुलाचा येत्या १० तारखेला लग्न सोहळा आहे. त्यामुळे या लग्नासाठी येणाऱ्या वऱ्हाडी मंडळींसाठी त्यांनी एक अट दिलेली आहे. यामध्ये असे लिहिलेला आहे की लग्नाला येणाऱ्या सगळ्या नातेवाईकांनी लग्नामध्ये आहेर आणि भेटवस्तू आणू नयेत. मात्र या बदल्यात येत्या २०१९ च्या लोकसभा निवडणुकीत संजय दादा मंडलिक यांना प्रचंड बहुमताने विजयी करा. तिच आमच्यासाठी भेटवस्तू ठरेल, अशी त्यांनी विनंती केलेली आहे. ही लग्नपत्रिका सोशल मीडियावर मोठ्या प्रमाणामध्ये व्हायरल होत असून सगळेजण या पत्रिकेची खिल्ली उडवत आहेत.
मुळचे भुदरगडच्या असणारे विजय भोसले यांचा मुलगा अभयसिंह भोसले यांचा विवाह कागल शहरात येत्या १० तारखेला मोठ्या उत्साहामध्ये संपन्न होणार आहे. राजकीय नेत्याचा मुलाचा विवाह असल्यामुळे या विवाहाला तितकीच गर्दी होण्याची शक्यता आहे. मात्र लोकांना निमंत्रण देण्यासाठी छापण्यात आलेल्या पत्रिकेच्या माध्यमातून आवाहन केल्यामुळे सध्या विजय भोसले चर्चेत आहेत.
