‘गेल्या वर्षीच्या गुढीपाडवा मेळाव्यात मनसे पक्षप्रमुख राजसाहेब ठाकरे यांनी मोदी-भाजप सरकारने सरकारी योजनांच्या प्रचारासाठी अक्षय कुमारच्या टॉयलेट एक प्रेमकथा आणि पॅडमॅन या दोन सिनेमांना पक्षामार्फत निधी उपलब्ध करून दिल्याचा आरोप केला होता. या घटनेला एक वर्ष उलटत नाही तोच आणखी एक मोठा ‘पराक्रम’ भाजपवाल्यांनी करून दाखवला आहे” असं सांगत मनसेच्या सरचिटणीस शालिनी ठाकरे यांनी विवेक ‘आनंद’ ओबेरॉय याची प्रमुख भूमिका असलेल्या ‘पीएम नरेंद्र मोदी’ या प्रचारकी सिनेमाच्या प्रदर्शनावर आक्षेप घेतला आहे.
View this post on Instagram
5th April 2019 ?#PMNarendraModi @omungkumar @officialsandipssingh @anandpandit @oberoi_suresh
या सिनेमातील गाणी ख्यातनाम गीतकार जावेद अख्तर आणि समीर यांनी लिहिल्याचं जाहीर करण्यात आलं. सिनेमाच्या अधिकृत पोस्टरवर तसा त्यांचा नामोल्लेख करण्यात आला. प्रत्यक्षात मात्र, जावेद अख्तर आणि समीर या दोघांनीही या सिनेमासाठी गीतलेखन केलेलं नाही. तसं त्यांनी जाहीरपणे सांगितलेलं आहे, असं शालिनी ठाकरे यांनी सांगितलं.
समाजातील किंवा सिनेक्षेत्रातील प्रतिष्ठित लोक मोदी यांच्यावरील सिनेमासाठी आपलं योगदान देत आहेत, असा एक समज या सिनेमाच्या ‘पडद्यामागील’ लोकांना जाणीवपूर्वक पसरवायचा आहे. महाराष्ट्र नवनिर्माण चित्रपट कर्मचारी सेना या गलिच्छ प्रचाराचा जाहीर निषेध करत असल्याचं मनसे चित्रपट सेनेचे अध्यक्ष अमेय खोपकर आणि कार्याध्यक्षा शालिनी ठाकरे यांनी म्हटलं आहे.
हा सिनेमा 5 एप्रिल रोजी प्रदर्शित होणार आहे. लोकसभा निवडणुकीच्या आचारसंहितेचं पालन सर्वांनी करावं, असं अपेक्षित असताना सत्ताधारी पक्षच जर आचारसंहितेला असा पायदळी तुडवणार असेल तर हा गैरप्रकार रोखण्यासाठी मनसेलाच खळ्ळ-खटॅक करावं लागेल, असा स्पष्ट इशारा शालिनी ठाकरे यांनी दिला आहे.
