हल्ली आपण खिशात-वॉलेटमध्ये जास्त रोख रक्कम घेऊन फिरत नाही. कारण काय? तर आपल्याला नाक्या-नाक्यावर एटीएम स्थानके आपल्या सेवेसाठी रात्रदिन कार्यरत असतात. त्यामुळे सध्या बरेच लोक आपल्याजवळ पैसे ठेवण्याला प्राधान्य देत नाहीत. मात्र, आता हे एटीएम कार्ड देखील बंद होणार असल्याची माहिती समोर आली आहे. डिजिटल व्यवहारांना चालना देण्यासाठी एसबीआयने एटीएम कार्ड बंद करण्याची योजना आखली असल्याची माहिती बँकेचे चेअरमन रजनीश कुमार यांनी दिली आहे. त्यामुळे याचा फटका एसबीआयच्या ९० कोटी एटीएम वापरणाऱ्या ग्राहकांना बसणार आहे.
एसबीआय लवकरच सर्व डेबिट कार्ड बंद करणार असून बँकेचे ग्राहक डिजिटल पेमेंट सेवेच्या माध्यमातून रोख रक्कम काढू शकणार आहेत. पुढील १८ महिने बँक या योजनेवर काम करणार आहे. देशातल्या डिजिटल पेमेंट सेवेला चालना देण्यासाठी एटीएम कार्ड बंद करण्याचा निर्णय घेतला आहे.
याचा करु शकता वापर
एटीएम कार्ड बंद झाल्यानंतर एसबीआयचे ग्राहक योनोच्या माध्यमातून पैसे काढू शकतील. योनो एसबीआयचे अॅप आहे. या माध्यमातून ग्राहक अतिशय सोप्या पद्धतीने रक्कम काढू शकतील. यामुळे एटीएम कार्डच्या माध्यमातून होणारी फसवणूक टाळता येणार असून एटीएम कार्ड स्वत:जवळ बाळगण्याची भासणार नाही, असे बँकेने म्हटले आहे.
कशी काढाल रक्कम?
- सर्वप्रथम तुमच्या मोबाईलवर योनो अॅप डाऊनलोड करा.
- त्यानंतर अॅप सुरु झाल्यावर योनो कॅश कॅटेगरी निवडा.
- रक्कम भरा
- रक्कम भरल्यानंतर डिजिटल व्यवहार पिनसाठी क्लिक करा.
- रजिस्टर्ड मोबाईल क्रमांकावर व्यवहार पिन मिळेल.
- रोख रक्कम काढण्यासाठी कोणत्याही योनो एटीएमवर पिन नंबर टाका
हेही वाचा – शिवसेनेला दोन मंत्रीपदे ज्यादा द्या; पण लवकर काय ते ठरवा – रामदास आठवले
