शिवसेना ठाकरे गटाचे नाशिक महानगरप्रमुख सुधाकर बडगुजर यांच्या अडचणींमध्ये दिवसेंदिवस वाढ होत आहे. नाशिक शहर पोलिसांनी रविवारी (दि.१७) सलग तिसर्‍या दिवशी दोन तास बडगुजर यांची चौकशी केली. तर, लाचलुचपत प्रतिबंधक विभाग (एसीबी़), नाशिकने सरकारवाडा पोलीस ठाण्यात बडगुजरांसह तिघांवर नाशिक महापालिकेत अपहार व बनावट दस्तऐवजसंदर्भात गुन्हा दाखल केला आहे. त्यामुळे राजकीय वर्तुळात खळबळ उडाली आहे. एसीबीकडून रविवारी बडगुजरांना चौकशीसाठी हजर राहण्याबाबत नोटीस देण्यात आली असून, त्यांना सोमवारी (दि.१८) एसीबीच्या कार्यालयात बोलवले जाणार आहे.
नाशिक महापालिकेचे तत्कालीन आयुक्त प्रवीण गेडाम यांनी माजी नगरसेवक सुधाकर बडगुजर यांच्याविरुद्ध दिलेल्या पत्राचे अनुशंषाने लाचचुचपत प्रतिबंधक विभाग, नाशिक येथे उघड चौकशी चालू होती. बडगुजर यांनी मे. बडगुजर अँड कंपनीतून डिसेंबर 2006 मध्ये निवृत्ती घेतल्याबाबतची खोटी व बनावट कागदपत्रे बनवली होती. त्यांनी नाशिक महापालिकेत 2007 पासून नगरसेवक व इतर पदे भूषवून बडगुजर अँड कंपनीस नाशिक महापालिकेकडून विविध ठेके मिळवून दिले. बडगुजर अ‍ॅन्ड कंपनीकडून 2006 ते सन 2009 या कालावधीत रक्कम रुपये 33 लाख 69 हजार 439 रुपये स्विकारुन बडगुजरांनी स्वतःचा आर्थिक फायदा करून घेतला. तसेच दोन साथीदारांसोबत संगनमत करुन नाशिक महापालिकेची फसवणूक केल्याचे निष्पन्न झाले.
याप्रकरणी सुधाकर भिका बडगुजर, साहेबराव रामदास शिंदे, सुरेश भिका चव्हाण यांच्याविरुद्ध भ्रष्टाचार प्रतिबंध अधिनियम सन 1988 चे कलम 13 (1) (ड) (i)(ii), 13 (2) सह कलम भा. द. वी. कलम 420, 467, 468, 471, 120 (ब) प्रमाणे गुन्हा दाखल करण्यात आला आहे.
