Corona In Maharashtra: राज्यातील कोरोनाबाधितांची संख्या १३ लाख पार!

राज्यात कोरोना विषाणूचा प्रादुर्भाव सातत्याने वाढत आहे. त्यामुळे राज्य सरकारने ‘माझे कुटुंब, माझी जबाबदारी’ यासारखी मोहीम राबवली आहे. या अंतर्गत राज्यातील कोरोना मृत्यूदर आणि रुग्णवाढीची संख्या कमी करण्याचा विश्वास मुख्यमंत्री उद्धव ठाकरेंनी काही दिवसांपूर्वी व्यक्त केला होता. पण आज राज्यातील कोरोनाबाधितांची रुग्ण संख्येने १३ लाखांचा टप्पा ओलांडला आहे. गेल्या २४ तासांत राज्यात १७ हजार ७९४ नवे कोरोनाबाधित आढळले असून ४१६ रुग्णांच्या मृत्यूची नोंद झाली आहे. त्यामुळे राज्यातील कोरोनाबाधितांची संख्या १३ लाख ७७५वर पोहोचली आहे. यापैकी आतापर्यंत ३४ हजार ७६१ रुग्णांचा मृत्यू झाला आहे. एकाबाजूला राज्यात रुग्णवाढ होत असून दुसऱ्या बाजूला रिकव्हरी रेट देखील वाढताना दिसत आहे.

आज दिवसभरात राज्यात १९ हजार ५९२ रुग्ण बरे होऊन घरी गेले असून आतापर्यंत एकूण ९ लाख ९२ हजार ८०६ रुग्ण कोरोनामुक्त झाले आहेत. यामुळे राज्यातील रिकव्हरी रेट ७६.३३ टक्के एवढा झाला आहे. सध्या राज्यातील मृत्यूदर २.६७ टक्के एवढा आहे. आजपर्यंत तपासण्यात आलेल्या ६२ लाख ८० हजार ७८८ प्रयोगशाळा नमुन्यांपैकी १३ लाख ७५७ (२०.७१टक्के) नमुने पॉझिटिव्ह आले आहेत. सध्या राज्यात २ लाख ७२ हजार ७७५ ऍक्टिव्ह रुग्ण आहेत.

राज्यातील जिल्हा आणि मनपानिहाय रुग्णांचा तपशील पुढील प्रमाणे..