बुलढाणा – आज प्रसिद्ध अशा भेंडवळच्या घट मांडणीचे भाकित जाहीर करण्यात आले. सूमारे 350 वर्षांची परंपरा असलेली ही प्रथा शेतकऱ्यांमध्ये विश्वासहार्य आहे. भेंडवळची ही घट मांडणी 3 मे रोजी संध्याकाळी ही घटमांडणी पार पडली. या घट मांडणीत शेती, पाऊस, आरोग्य आणि राजकारणाविषयी भाकित केले जाते.
भेंडवळ घटमांडणीनुसार, यंदा जून महिन्यात चांगला पाऊस तर जुलै महिन्यात साधारण पाऊस असेल. ऑगस्ट आणि सप्टेंबर महिन्यात चांगला पाऊस पडणार आहे. यंदाही बळीराजाला अवकाळीचा सामना करावा लागणार आहे. दोन वर्ष सामना करत असलेल्या कोरोनाचा यंदा नायनाट होण्याची शक्यता आहे, असा अंदाज भेंडवळच्या घटमांडणीतून वर्तवण्यात आला आहे.
पावसाबाबत भविष्यवाणी –
जून महिन्यात चांगला पाऊस तर जुलै महिन्यात साधारण पाऊस पडणार आहे.
ऑगस्ट आणि सप्टेंबर महिन्यात चांगला पाऊस असेल.
अवकाळीची चिंता वर्षभर शेतकऱ्यांना सतावणार आहे.
पिकांबाबतची भविष्यवाणी –
कापूस, उडीद, ज्वारी, हरभरा ही पिकं चांगली येतील.
वाटाणा, बाजरी, गहू, करडई ही पिकं मध्यम स्वरूपात येतील.
बळीराजाला पिकांना भाव न मिळाल्यामुळे चिंता जाणवेल
लवकर येणाऱ्या पिकांचं नुकसान होण्याची शक्यता आहे.
रोगराईबद्दल भविष्यवाणी –
यावर्षी रोगराई राहणार नाही
कोरोनासारख्या महामारीतून यावर्षभरात तरी दिलासा मिळण्याची शक्यता आहे
राजकीय क्षेत्राबद्दल भविष्यवाणी –
राजाची गादी कायम राहणार
सत्ता पालट होणार नाही
देशावरील संकटावर भविष्यवाणी –
देशाच्या सरंक्षण खात्यावर जास्त दबाव राहणार नाही.
देशाचे संरक्षण चांगले राहील
देश आर्थिक अडचणीत असेल
भेंडवळमध्ये भविष्यवाणी कशी होते –
भेंडवळची घट मांडणी अक्षय्य तृतीयाच्या मुहूर्तावर सायंकाळी करण्यात येते. अक्षय्य तृतीयेच्या दिवशी सूर्यास्तापूर्वी गावाबाहेरील शेतात घटाची आखणी करुन, त्यात घागर, मातीचे ढेकळे, पापड, पुरी, सांडोळी, कुरडी, पान आणि त्यावर सुपारी, गहू, ज्वारी, तूर, उडीद, मूग, हरभरा, जवस, तीळ बाजरी, तांदूळ, अंबाडी, वाटाणा, सरकी, मसूर, करडी असे एकूण 18 प्रकारच्या धान्याची प्रतिकात्मक मांडणी केली जाते. पृथ्वीचे प्रतिकात्मक स्वरुपातील पुरी, समुद्राचं प्रतिक म्हणून घागर आणि त्यावर पापड, वडा, पावसाळ्याचे प्रतिक म्हणून मातीचे ढेकळे, वडा, पानसुपारी यांचीही मांडणी केली जाते. त्यानंतर दुसऱ्या दिवशी घटमांडणीमधील बदलांचे निरीक्षण करुन भाकित वर्तवले जाते.
