मंत्रालयातील दालनात छत्रपती शिवाजी महाराज जयंतीनिमित्त पत्रकार परिषदेचे आयोजन करण्यात आले होते. यावेळी विधानपरिषद सदस्य प्रविण दरेकर उपस्थित होते. या कार्यक्रमाला मुख्यमंत्री एकनाथ शिंदे, उपमुख्यमंत्री देवेंद्र फडणवीस, खासदार श्रीमंत छत्रपती उदयनराजे भोसले, उच्च व तंत्रशिक्षण, वस्त्रोद्योग आणि संसदीय कार्यमंत्री तथा पालकमंत्री पुणे जिल्हा चंद्रकांत पाटील, विरोधी पक्षनेते अजित पवार, विधान परिषद उपसभापती, डॉ. नीलम गोऱ्हे यांसह पुणे जिल्ह्यातील सर्व लोकप्रतिनिधी यांची उपस्थित राहणार असल्याची माहिती मंत्री मंगलप्रभात लोढा यांच्याकडून देण्यात आली.
यंदाची शिवजयंती उत्साहात साजरी करण्यासोबतच महाराष्ट्रातील लोकसंस्कृती व महाराष्ट्राचा ऐतिहासिक वारसा नव्या पिढीपर्यंत पोहोचविण्यासाठी तसेच पर्यटन वाढीसाठी महाराष्ट्र शासनाचा पर्यटन विभाग प्रयत्नशील आहे. पर्यटन विभागामार्फत राज्यातील महत्वाच्या उपक्रमांचे पर्यटन वेळापत्रक बनविण्यात आले असून त्याच उपक्रमांतर्गत यंदाच्या वर्षांपासून शिवजयंती मोठ्या उत्साहात साजरी करण्यात येणार आहे. या सोहळ्यामध्ये जवळपास एक लाख शिवप्रेमी या उत्साहात सहभागी होतील असे नियोजन महाराष्ट्र शासनाकडून करण्यात आले आहे.
किल्ले शिवनेरीवरती जन्मोत्सव सोहळा साजरा करण्याबरोबरच किल्ल्याच्या पायथ्याजवळ जुन्नर शहरात विविध कार्यक्रमांचे आयोजन करण्यात आले आहे. ‘शिवकालीन गाव’ हे या महोत्सवाचे प्रमुख आकर्षण असून यावर्षी प्रथमच ‘महाशिव आरती’चे आयोजन करण्यात आले आहे. सोहळ्याच्या निमित्ताने शिव वंदना, स्थानिक पारंपरिक आणि सांस्कृतिक कार्यक्रमांचे आयोजन, महाविद्यालयीन विद्यार्थ्यांसाठी शिबीर, विविध स्पर्धांचे आयोजन, पर्यटक आणि मान्यवरांसाठी सहलीचे इत्यादींचे आयोजन करण्यात येईल. या कार्यक्रमासाठी प्रवेश विनामूल्य असून कार्यक्रम सर्वांसाठी खुला असल्याची माहिती देण्यात आली आहे.
यंदाच्या वर्षी शिवजयंतीनिमित्त तीन दिवस विविध कार्यक्रमांचे आयोजन करण्यात आले आहे. दि. १८ फेब्रुवारी २०२३ रोजी सायं. ६:३० वा. हिंदवी स्वराज्य महोत्सव २०२३ उद्घाटन करण्यात येणार आहे. तर सायं. ७ ते रात्री १० वा. सुप्रसिद्ध दिग्दर्शक अशोक हांडे यांचा ‘मराठी बाणा’ कार्यक्रम होणार आहे. दि.१९ फेब्रुवारी रोजी स. ९ ते ११ वा. किल्ले शिवनेरीवर शिवजन्मोत्सव सोहळा होणार असून दु. ३ ते ५ वा. शिववंदना होईल. सायं. ६.१५ ते ७ वा. महाशिवआरतीचे आयोजन करण्यात आले आहे. सायं. ७ ते रात्री १० वा. जाणता राजा या महानाट्याचा कार्यक्रम होईल. दि. २० फेब्रुवारी २०२३ रोजी सायं. ७ ते रात्री १० वा. जाणता राजा कार्यक्रम होईल. या तीनही दिवशी विविध बचतगटांची उत्पादने व खाद्यपदार्थांच्या ३०० स्टॉलचे प्रदर्शन आयोजित करण्यात आले आहे.
हेही वाचा – Shivjayanti 2023 : मुंबईतील २२७ वॉर्डांमध्ये गुंजणार जय जय शिवराय आरतीचा जयघोष
महाराष्ट्र राज्याची अस्मिता आणि आपले आराध्य दैवत श्री छत्रपती शिवाजी महाराजांची यंदा ३९३ वी जयंती साजरी करण्यात येणार आहे. त्याचबरोबर यावर्षी छत्रपती शिवाजी महाराजांच्या राज्याभिषेकाला ३५० वर्षे पूर्ण होत आहेत. छत्रपती शिवाजी महाराजांमुळे महाराष्ट्राची ओळख जगभरात पोहोचली आहे. त्यांनी स्वराज्य रक्षणासाठी उभारलेले गड-किल्ले जगभरातील पर्यटन प्रेमींचे मुख्य आकर्षण आहे. यात शिवनेरी, रायगड व सिंधुदुर्ग हे महत्वाचे किल्ले आहेत. शिवजन्मोत्सवाच्या निमित्ताने पुन्हा एकदा हिंदवी स्वराज्य ही भावना आणि आपले वैभव नव्यापिढी पर्यंत पोहोचविण्याचा प्रयत्न आहे. आपले आराध्य दैवत असलेल्या छत्रपती शिवाजी महाराजांना मानाचा मुजरा करण्यासाठी आणि महाराष्ट्राच्या लोकसंस्कृती विषयी अभिमान व्यक्त करण्यासाठी नागरिकांनी शिवजन्मोत्सव सोहळ्यात सहभागी व्हावे, असे आवाहन मंत्री मंगलप्रभात लोढा यांनी केले आहे.
