महापालिकेच्या सायन हॉस्पिटलमध्ये झुरळांनी थैमान घातल्यानंतर आता पालिकेच्या शाळांनाही वाळवी लागली असल्याचा प्रकार उघडकीस आला आहे. गोवंडी व परळ येथील पालिकेच्या शाळांमध्ये वाळवी लागल्याने शिक्षण विभागावर टीकेची झोड उठवण्यात येत आहे.
मुंबई महापालिकेच्या गोवंडी येथील एच.पी. स्कूलमध्ये मोठ्या प्रमाणात वाळवी लागली आहे. ही वाळवी फक्त इमारतीच्या भिंतीलाच लागलेली नसून शाळेतील कपाटांमध्ये ठेवण्यात आलेल्या पुस्तकांनाही लागलेली आहे. त्यामुळे अनेक चांगली पुस्तके खराब झाली आहेत. या पुस्तकांचा विद्यार्थ्यांचा काहीच उपयोग होत नसल्याचे आरोग्य समिती सदस्या व राष्ट्रवादी काँग्रेसच्या नगरसेविका सईदा खान यांनी गुरुवारी शिक्षण समितीच्या बैठकीत पालिका प्रशासनाच्या निदर्शनास आणून दिले. एच.पी. स्कूलमध्ये 2013 पासून वाळवी पसरलेली आहे. त्यावेळी मी प्रश्न उपस्थित केल्यावर शाळेत पेस्ट कंट्रोल केले होते. परंतु त्यानंतर पुन्हा शाळेत पेस्ट कंट्रोल झाले नसल्याने पुन्हा वाळवी पसरली आहे. शाळेच्या इमारतीची डागडुजी करणार असल्याचे शाळा प्रशासनाकडून सांगण्यात येत आहे. मात्र वाळवीला नियंत्रणात आणले नाही तर ही डागडुजीही निरुपयोगी ठरेल, असा आरोप सईदा खान यांनी केला.
परळमधील पालिकेच्या काही शाळा बंद पडल्या आहेत. या शाळांमधील भंगार साईनाथ महापालिकेच्या पाचव्या मजल्यावर टाकण्यात आले आहे. पण त्याकडे दुर्लक्ष करण्यात आल्यामुळे या मजल्यावर सर्वत्र वाळवी पसरली आहे. त्यावर लवकर पेस्ट कंट्रोल न केल्यास संपूर्ण इमारतीला वाळवी लागण्याची शक्यता आहे, अशी माहिती परळ येथील शिवसेनेचे नगरसेवक सचिन पडवळ यांनी दिली.
शिक्षण विभागाच्या सर्व प्रशासकीय अधिकार्‍यांनी त्यांच्या विभागातील शाळांमध्ये पेस्ट कंट्रोल करणे आवश्यक आहे. त्यानुसार त्यांनी खासगी कंत्राटदारामार्फत तातडीने पेस्ट कंट्रोल करून घ्यावे, अशा सूचना शिक्षण समितीचे अध्यक्ष मंगेश सातमकर यांनी पालिका प्रशासनाला दिल्या आहेत.
पालिकेने पेस्ट कंट्रोलबाबात धोरण निश्चित केले आहे. यात खासगी एजन्सीची नियुक्ती करून पेस्ट कंट्रोल करायचे आहे. पण धोरणाच्या अंमलबजावणीबाबत स्पष्टता नसल्याने हॉस्पिटल व शाळांकडून दुर्लक्ष होत आहे. झुरळे मारण्याच्या औषधांप्रमाणेच वाळवी रोखण्याचे औषधही नसल्याचे प्रशासनाने मान्य केले आहे.
सईदा खान, सदस्य, शिक्षण समिती
