मुंबई :मणिपूर येथून काँग्रेस नेते राहुल गांधी यांनी भारत जोडो न्याय यात्रेला सुरुवात केली होती. या यात्रेचा समारोप त्यांनी मुंबईच्या दादर येथील चैत्यभूमीवर केला. यानंतर आज इंडिया आघाडीची सभा शिवाजी पार्कवर होणार आहे. मात्र सभेआधीच इंडिया आघाडीचे सर्व बॅनर्स शिवाजी पार्क परिसरातून हटविण्यात आले. निवडणूक आयोगाने शनिवारी निवडणुकांची घोषणा करतानाच देशभरात आचारसंहिता लागू केली आहे. त्यामुळे देशातून राजकीय पक्षांचे बॅनर हटविण्याचे काम प्रशासनाकडून हाती घेण्यात आले आहे. याचपार्श्वभूमीवर शिवाजी पार्क परिसरातून राहुल गांधी यांचे पोस्टर्स हटविण्यात आले आहेत. (PHOTO Rahul Gandhis posters were removed from Shivaji Park area before the india alliance meeting)
मणिपूर येथून निघालेली काँग्रेस नेते राहुल गांधी यांची भारत जोडो न्याय यात्रा दोन महिन्यानंतर सुमारे 6700 किमी प्रवास करून दादर येथील डॉ. बाबासाहेब आंबेडकर यांच्या चैत्यभूमी या स्मारकस्थळी शनिवारी दाखल झाली. राहुल यांचे मुंबईत जोरदार स्वागत करण्यात आले.
चैत्यभूमीला भेट दिल्यानंतर राहुल गांधी यांच्या भारत जोडो न्याय यात्रेची सभा धारावी येथे पार पडली. या सभेला काँग्रेस नेत्या प्रियंका गांधी, राजस्थानचे माजी मुख्यमंत्री अशोक गेहलोत आदी नेते उपस्थित होते.
राहुल गांधी यांनी आज मणिभवन ते ऑगस्ट क्रांती मैदान अशी पदयात्रा काढली. यानंतर आज संध्याकाळी शिवाजी पार्क येथील मैदानावर इंडिया आघाडीची लोकसभा प्रचाराचा दृष्टीने पहिली सभा होणार आहे.
निवडणूक आयोगाने शनिवारी देशातील लोकसभा निवडणुकांची घोषणा केली, तसेच आचारसंहिता लागू केली. त्यामुळे देशाभरातील सर्व राजकीय पक्षांचे पोस्टर्स हटविण्याचे काम हाती घेण्यात आले आहे.
राहुल गांधी यांच्या भारत जोडो न्याय यात्रेची सांगता सभा सुरुवातीला शिवाजी पार्कवर होणार होती. त्यामुळे राहुल गांधींच्या स्वागतासाठी काँग्रेस पदाधिकारी आणि कार्यकर्त्यांकडून त्यांचे स्वागत करण्यासाठी पोस्टर्स लावण्यात आले होते.
निवडणूक आयोगाने आचारसंहिता लागू केल्यानंतर राहुल गांधी यांचे पोस्टर्स मध्यरात्री महापालिका प्रशासनाकडून हटविण्यात आले आहेत.
