भारतामध्ये कोरोनाचा धोका वाढताना दिसत आहे. त्यामुळे कोरोनाचा संसर्ग रोखण्यासाठी केंद्र सरकारने १ मेपासून १८ वर्षांवरील सर्व नागरिकांना कोरोना प्रतिबंधात्मक लस देण्याचा निर्णय घेतला आहे. त्यामुळे आता इंडियन प्रीमियर लीग (IPL) स्पर्धेत खेळणाऱ्या खेळाडूंबाबत भारतीय क्रिकेट नियामक मंडळ (BCCI) काय निर्णय घेणार, याकडे सर्वांचे लक्ष होते. देशात कोरोनाचा प्रादुर्भाव वाढत असल्याने काही खेळाडूंना या स्पर्धेतून माघार घेतली आहे. त्यामुळे खेळाडूंच्या सुरक्षिततेसाठी बीसीसीआय कोणती पावले उचलणार? ते सर्वांना लस घेणे बंधनकारक करणार का? असे प्रश्न उपस्थित केले जात होते. मात्र, कोरोना प्रतिबंधात्मक लस घ्यायची की नाही, हा निर्णय सर्वस्वी खेळाडूंचा असेल, असे बीसीसीआयने स्पष्ट केले आहे.
भारतीय खेळाडूंनाच लस
भारतीय खेळाडू येत्या शनिवारपासून कोरोना प्रतिबंधात्मक लस घेऊ शकणार आहेत. मात्र, लस घ्यायची की नाही, हे खेळाडूच ठरवतील. आम्ही त्यांच्या निर्णयात हस्तक्षेप करणार नाही, असे बीसीसीआयच्या सूत्रांकडून सांगण्यात आले. तसेच परदेशी खेळाडूंना लस घेता येणार आहे का? असे विचारले असता सूत्रांनी सांगितले, केवळ भारतीय खेळाडूंनाच लस घेण्याची परवानगी आहे.
IPL 2021: BCCI to let players decide on COVID-19 vaccination
Read @ANI story I https://t.co/YNR1t5i7NA pic.twitter.com/4feTo8BlNp
— ANI Digital (@ani_digital) April 27, 2021
कमिन्सने जपले सामाजिक भान
दरम्यान कोलकाता नाईट रायडर्सचा ऑस्ट्रेलियन वेगवान गोलंदाज पॅट कमिन्सने सामाजिक भान जपत भारतातील ऑक्सिजनच्या पुरवठ्याची समस्या सोडवण्यासाठी ५० हजार डॉलर म्हणजेच साधारण ३७ लाख रुपये पंतप्रधान सहाय्यता निधीसाठी दिले. तसेच जगभरातील इतर खेळाडूंनीही पुढाकार घेत या संकटाच्या काळामध्ये मदतनिधी द्यावा आणि मदतीसाठी पुढे यावे, असे आवाहनही कमिन्सने केले आहे.