सीएसएमटी स्थानकाजवळील दादाभाई नौरोजी मार्गावरील हिमालय पादचारी पूल गुरुवारी, १४ मार्च रोजी सायंकाळी ऐन गर्दीच्या वेळी कोसळून झालेल्या दुर्घटनेत सहा जण मृत्युमुखी पडले, तर ३१ जण जखमी झाले होते. या दुर्घटनेप्रकरणी चुकीचा स्ट्रक्चरल अहवाल दिल्याचा ठपका असलेलस स्ट्रक्चरल ऑडिटर नीरजकुमार देसाई याला अटक करण्यात आली आहे. सदोष मनुष्यवधाप्रकरणी त्याच्यावर ही कारवाई करण्यात आली आहे. पोलिसांनी गुन्ह्यात बदल केला असून ३०४ (अ) ऐवजी ३०४ (आयआय) हा गुन्हा दाखल करण्यात आला आहे. यापूर्वी दाखल केलेला ३०४ (अ) हा गुन्हा हयगयी आणि निष्काळजीपणा मुळे मृत्यूस कारणीभूत असा होता. नीरज ला अटक करण्याची प्रक्रिया सुरू असून रात्री उशिरा पर्यंत अटक होण्याची शक्यता आहे
Mumbai bridge collapse: Neeraj Desai, auditor who had conducted an audit of the bridge has been arrested by Police. pic.twitter.com/6bHvVzwN2J
— ANI (@ANI) March 18, 2019
२२ मार्चला हायकोर्टात सुनावणी
सीएसएमटी पूल दुर्घटनाप्रकरणी मुख्य अभियंता एस. ओ. कोरी, ए. आर. पाटील, उपमुख्य अभियंता आर. बी. तारे आणि सहाय्यक अभियंता एसएफ काकुळते यांचे निलंबन करण्यात आले आहे. दरम्यान, या दुर्घटनेप्रकरणी रेल्वे आणि महापालिका अधिकाऱ्यांविरोधात सदोष मनुष्यवधाचा गुन्हा दाखल करण्यात आला आहे. आझाद मैदान पोलिसांत कलम ३०४ अ अंतर्गत हा गुन्हा नोंदवला असून, प्रकरणाचा तपास सुरू आहे. या याचिकेवर २२ मार्च रोजी मुंबई हायकोर्टात सुनावणी होणार आहे. तत्पूर्वी मुंबई महापालिकेनेही कारवाई केली होती. पूल दुर्घटनाप्रकरणी संबधित अभियंत्यांना तातडीने निलंबित करण्यात आले होते. तर निवृत्त अभियंत्यांची चौकशी केली जाणार आहे. स्ट्रक्चरल ऑडिटचा चुकीचा अहवाल देणाऱ्या देसाई कन्सल्टन्सला काळ्या यादीत टाकले आहे. तर कंत्राटदार आरपीएस कंपनीला कारणे दाखवा नोटीस पाठवण्यात आली आहे.
