हिंदुजा रुग्णालय, मुंबई बंदर या संघांनी महाराष्ट्र कामगार कल्याण मंडळ आयोजित रौप्यमहोत्सवी शहरी पुरुष व्यावसायिक गटाच्या कबड्डी स्पर्धेत आपली विजयी घोडदौड सुरु ठेवली. शहरी पुरुष व्यावसायिक अ गटात गतविजेत्या मुंबई बंदर संघाने टीम ग्लोबलचा ४४-१८ असा पराभव केला. या सामन्याच्या मध्यंतराला मुंबई बंदरकडे २३-८ अशी भक्कम आघाडी होती. उत्तरार्धातही त्यांनी चांगला खेळ सुरु ठेवत हा सामना २६ गुणांच्या फरकाने जिंकला.
फ गटात हिंदुजाने भारतीय आयुर्विमावर ३४-२६ अशी मात केली. पहिल्या डावात हिंदुजाचा संघ १२-१३ असा पिछाडीवर पडला होता. मात्र, जितू बागडे, वैभव शिंदे, केतन पवार यांच्या अप्रतिम खेळाच्या जोरावर हिंदुजाने दमदार पुनरागमन करत हा सामना जिंकला. क गटात न्यू इंडिया एशोरन्स संघाने सिमेन्सचा ३७-७ असा धुव्वा उडवला. केतन कळवनकर, अभिषेक रामाणे, निलेश पवार यांच्या खेळाला या विजयाचे श्रेय जाते.
स्नेहविकासविरुद्ध चंद्रोदय पराभूत!
शहरी महिलांच्या पहिल्या फेरीत भांडुपच्या स्नेहविकासने प्रभादेवीच्या चंद्रोदयचा ४२-३४ असा पराभव केला. सोनाली पाटील, रिया तावडे स्नेहविकासकडून, तर निकिता खैरे, वृषाली पाटील चंद्रोदयकडून चांगल्या खेळल्या. तसेच महात्मा फुले संघाने मुंबईच्या व्ही.के.बी. स्मृतीचा ६७-२० असा धुव्वा उडवला. नवी मुंबईच्या राजश्री शाहू महाराज संघाने चुरशीच्या लढतीत ठाण्याच्या होतकरूचा १९-१५ असा पराभव केला.
