सर्बियाच्या नोवाक जोकोविचने फ्रेंच ओपन ग्रँड स्लॅम स्पर्धेची विजयी सुरुवात केली. जागतिक क्रमवारीत अव्वल स्थानी असलेल्या जोकोविचने पहिल्या फेरीत अमेरिकेच्या टेन्यस सँडग्रेनवर ६-२, ६-४, ६-२ अशी सरळ सेटमध्ये मात केली. रात्रीच्या सत्रात झालेला हा पुरुष एकेरीतील पहिलाच सामना ठरला. फ्रांसमध्ये रात्री ९ वाजेनंतर असलेल्या कर्फ्यूमुळे या सामन्यात प्रेक्षकांना परवानगी नव्हती. परंतु, प्रेक्षकांच्या पाठिंब्याशिवायही जोकोविचने उत्कृष्ट खेळ करत सरळ सेटमध्ये हा सामना जिंकत दुसऱ्या फेरीत प्रवेश केला. जोकोविचला मागील वर्षीच्या अंतिम सामन्यात राफेल नदालने पराभूत केले होते. त्यामुळे यंदा दमदार पुनरागमन करत १९ वे ग्रँड स्लॅम जेतेपद पटकावण्यास जोकोविच उत्सुक आहे.
Simply Stunning 👏@DjokerNole puts on a near perfect display to sail to his 17th consecutive first round victory in Paris 6-2, 6-4, 6-2 over Sandgren.#RolandGarros pic.twitter.com/lFAF0Aikgt
— Roland-Garros (@rolandgarros) June 1, 2021
पहिल्या फेरीत सलग १७ वा विजय
जागतिक क्रमवारीत ६६ व्या स्थानी असलेल्या सँडग्रेनविरुद्धच्या पहिल्या फेरीतील सामन्यात जोकोविचने सुरुवातीपासून चांगला खेळ केला. त्याने या सामन्यात सँडग्रेनची सर्व्हिस तब्बल पाच वेळा मोडली. सँडग्रेनने दुसऱ्या सेटमध्ये जोकोविचला काहीशी झुंज दिली. परंतु, जोकोविचने उत्कृष्ट खेळ करत हा सामना ६-२, ६-४, ६-२ असा सरळ सेटमध्ये जिंकत दुसरी फेरी गाठली. फ्रेंच ओपनमध्ये पहिल्या फेरीतील हा जोकोविचचा सलग १७ वा विजय ठरला. आता दुसऱ्या फेरीत त्याच्यापुढे उरुग्वेच्या पाब्लो क्यूवासचे आव्हान असेल.
राफेल नदालची आगेकूच
तसेच स्पेनचा स्टार टेनिसपटू आणि फ्रेंच ओपनमधील सर्वात यशस्वी खेळाडू राफेल नदाललाही विजयी सलामी देण्यात यश आले. तिसऱ्या सीडेड नदालने ऑस्ट्रेलियाच्या अलेक्सी पोपीरीनचा ६-३, ६-२, ७-६ (७-३) असा सरळ सेटमध्ये पराभव केला. तसेच माटेयो बेरेटिनीने जपानच्या तारो डॅनियलवर ६-०, ६-४, ४-६, ६-४ अशी मात करत दुसऱ्या फेरीत प्रवेश केला.