मुंबई शहर कबड्डी असोसिएशन आयोजित जिल्हा अजिंक्यपद निवड चाचणी कबड्डी स्पर्धेच्या सब-ज्युनियर गटात शिवमुद्रा प्रतिष्ठान, जय दत्तगुरु कबड्डी संघाने, तर प्रथम श्रेणी व्यावसायिक पुरुषांत वैभव टूर्स अँड ट्रॅव्हल, शिवाज इंटरप्रायझेस, मुंबई तामिळ कबड्डी संघ यांनी चौथ्या फेरीत प्रवेश केला. सब-ज्युनियर गटाच्या तिसर्या फेरीत शिवमुद्रा प्रतिष्ठानने ओम ज्ञानदीप मंडळाचा ६०-३४ असा पराभव करत स्पर्धेत आगेकूच केली. विशाल लाड, यश बेले यांनी सुरुवातीपासूनच आक्रमक खेळ करत शिवमुद्राला मध्यंतराला ३४-५ अशी भली भक्कम आघाडी मिळवून दिली. त्यानंतरही त्यांनी दमदार खेळ सुरु ठेवत हा सामना जिंकला.
दुसरीकडे जय दत्तगुरु कबड्डी संघाने सिद्धीप्रभा फाऊंडेशनवर ४९-२८ अशी मात केली. या सामन्याच्या मध्यंतराला जय दत्तगुरूकडे २६-१६ अशी आघाडी होती. त्यांच्या या विजयात सिद्धेश नेरुरकर, स्वप्नील पाटील हे खेळाडू चमकले. वीर बजरंग कबड्डी संघाने यश क्रीडा मंडळावर ६०-३४ अशी मात केली. या सामन्याच्या पहिल्या डावात २१-१४ अशी आघाडी घेणार्या वीर बजरंगच्या दीपक सूर्यवंशी, श्रीराज भडसाळे यांनी या सामन्यात अप्रतिम खेळ केला.
प्रथम श्रेणी व्यावसायिक पुरुषांच्या तिसर्या फेरीच्या सामन्यात वैभव टूर्स अँड ट्रॅव्हलने मध्यंतरातील ८-१६ अशी पिछाडी भरून काढत विनायक इंटरप्रायझेसवर ३७-२७ अशी मात करत चौथ्या फेरीत धडक दिली. श्री सनकुळकर, निखिल धामणे यांनी चांगला खेळ करत विनायक इंटरप्रायझेसला ८ गुणांची आघाडी मिळवून दिली होती. मात्र, उत्तरार्धात वैभव टूर्सच्या राहुल मोरे, सुधीर सावंत यांनी जोरदार पुनरागमन केल्याने वैभवने हा सामना जिंकला. शिवाज इंटरप्रायझेसने राजेश बोराडे, आदिनाथ घुले यांच्या चढाई-पकडीच्या खेळाच्या जोरावर श्री समर्थ इंटरप्रायझेसला ३५-३३ असे नमवत आगेकूच केली. मुंबई तामिळ कबड्डी संघाने सायली असोसिएटला ५६-४२ असे पराभूत केले. पहिल्या डावात १८-९ अशी आघाडी घेणार्या तामिळकडून सुरेश नाडार, आयप्पा यांनी अप्रतिम खेळ केला.
तिसर्या फेरीचे इतर निकाल संक्षिप्त.
व्यावसायिक प्रथम श्रेणी पुरुष : १] टी.बी.एस स्पोर्ट्स विजयी वि. मातोश्री कन्सल्टंसी (२६-१२), २] चिनू स्पोर्ट्स विजयी वि. एस.आर.जे ग्रुप (१४-०७).
सब-ज्युनियर गट : १] स्वयंस्वराज क्रीडा मंडळ विजयी वि. जागृती सेवा मंडळ (७१-३९), २] वीर संताजी क्रीडा मंडळ विजयी वि. यश क्रीडा मंडळ (५१-२८), ३] अमर संदेश स्पोर्ट्स विजयी वि. श्री साई क्लब (५८-२१).
