राष्ट्रीय सुरक्षा मुद्द्याच्या पार्श्वभूमीवर भारताने ५९ चीनी apps वर बंदी घालत चीनवर डिजिटल स्ट्राईक केलं. दरम्यान, आता अमेरिकेनेही चीनी app वर डिजिटल स्ट्राईक केलं आहे. अमेरिकन कम्युनिकेशन्स नेटवर्क सुरक्षित करण्याच्या प्रयत्नांचा एक भाग म्हणून अमेरिकेच्या फेडरल कम्युनिकेशन्स कमिशन (एफसीसी) ने चीनची हुआवेई (Huawei) टेक्नॉलॉजी कंपनी आणि झेडटीई (ZTE) कॉर्पोरेशन या कंपन्या राष्ट्रीय सुरक्षेसाठी धोका असल्याचं म्हटलं आहे. या कारवाईचा अर्थ असा आहे की बर्‍याच लहान ग्रामीण वाहकांनी वापरलेल्या फेडरल सबसिडी पैशांचा यापुढे या कंपन्यांद्वारे उत्पादित उपकरणे खरेदी करण्यासाठी वापर करता येणार नाही, असं एफसीसीने प्रसिद्धीपत्रकात म्हटलं आहे.
निवेदनात म्हटलं आहे की हुआवेई (Huawei) आणि झेडटीई (ZTE) या दोन्ही कंपन्यांचे चीनी कम्युनिस्ट पार्टी आणि चीनच्या लष्करी यंत्रणेशी जवळचे संबंध आहेत. या प्रकरणात, एफसीसीचे अध्यक्ष अजित पै यांनी ट्विट केलं आहे की, “आम्ही एक स्पष्ट संदेश पाठवत आहोत की अमेरिकन सरकार आणि विशेषत: एफसीसी अमेरिकन कम्युनिकेशन नेटवर्कमध्ये चीनी कम्युनिस्ट पक्षाला फायदा होऊ देणार नाही.” व्यापार, कोरोनो विषाणू आणि सुरक्षिततेच्या मुद्द्यांवरून बीजिंग आणि वॉशिंग्टनमधील वाढत्या तणावाच्या पार्श्वभूमीवर, एफसीसीने चिनी कंपन्यांचा अधिक तपास केला आहे.
चिनी टेलिफोन कंपन्यांवरील बंदीचा विचारही संस्था करीत आहे. गतवर्षी चायना मोबाइल लिमिटेडला अमेरिकेच्या बाजारात प्रवेश करण्यासही बंदी घातली होती. अमेरिकेचे म्हणणं आहे की चीन हुआवेईची (Huawei) उपकरणे हेरगिरीसाठी वापरु शकतील. तथापि, कंपनीने हा दावा अनेक वेळा नाकारला आहे. चीन सरकारपासून स्वतंत्र आहोत, असं कंपनीने म्हटलं होतं. तथापि, एफसीसीच्या आदेशासंदर्भात झेडटीई आणि हुआवेईकडून अद्याप कोणतीही प्रतिक्रिया आलेली नाही. परंतु कंपनीने नोव्हेंबरमध्ये झालेल्या मतदानाबद्दल एफसीसीच्या कारवाईचा तीव्र निषेध केला होता. या प्रकरणात, एफसीसी आयुक्त म्हणाले की, चीनच्या उपकरणांवर विश्वास ठेवू शकत नाही. अमेरिकन कॉंग्रेसने यासाठी पर्याय उपलब्ध करुन द्यावा, असंही ते म्हणाले.
