राज्यातील मराठा आरक्षणावरील स्थगिती सर्वोच्च न्यायालयाने कायम ठेवल्यानंतर मराठा तरुण आंदोलन करत आहेत. सर्वोच्च न्यायालयाच्या निर्णयानंतर राज्यातील विरोधी पक्ष भाजपने ठाकरे सरकारवर मराठा समाजाला आरक्षण मिळण्याच्या बाबतीत राज्य शासन गंभीर नसल्याचे आरोप केले. दरम्यान, आज विधान परिषदेचे विरोधी पक्षनेते प्रवीण दरेकर यांनी मराठा तरुणांच्या संयमाचा अंत पाहू नका, असा इशारा राज्य सरकारला दिला आहे. तसेच, आघाडी सरकारचे माघलाईचे राज्य सुरु आहे, अशी टीका प्रवीण दरेकर यांनी केली आहे. दरेकर यांनी व्हीडिओ शेअर केला असून यामध्ये मराठा तरुण आंदोलन करताना दिसत आहेत.
प्रवीण दरेकर यांनी एक व्हिडीओ ट्विट करत राज्यातील महाविकास आघाडी सरकारवर टीका केली आहे. दरेकर यांनी ट्विट केलेल्या व्हीडिओत काही मराठा तरूण आंदोलन करताना दिसले. एक मराठा, लाख मराठा अशी घोषणाबाजीही होताना दिसली. यासोबतच त्यांनी एक ट्विटदेखील केले आहे. या ट्विटच्या माध्यमातून त्यांनी सरकारला इशारा दिला आहे. “आघाडी सरकारचे मोघलाईचे राज्य सुरु आहे. आंदोलनकर्त्या मराठा तरुणांवर केसेस दाखल करण्यात आल्या. अधिवेशन चालू असताना लोकशाही मार्गाने आंदोलनासाठी मुंबईत येणाऱ्या मराठा तरुणांना ठिकठिकाणी अडवण्यात येत आहे. तरुणांच्या संयमाचा अंत पाहू नका,” असा इशारा त्यांनी उद्धव ठाकरे सरकारला दिला आहे.
आघाडी सरकारचं मोघलाईचं राज्य सुरु आहे. आंदोलनकर्त्या मराठा तरुणांवर केसेस दाखल करण्यात आल्या.अधिवेशन चालू असताना लोकशाही मार्गाने आंदोलनासाठी मुंबईत येणाऱ्या मराठा तरुणांना ठिकठिकाणी अडवण्यात येत आहे.तरुणांच्या संयमाचा अंत पाहू नका.@CMOMaharashtra @AnilDeshmukhNCP pic.twitter.com/4zmYc19mmO
— Pravin Darekar – प्रविण दरेकर (@mipravindarekar) December 14, 2020
मराठा आरक्षणाबद्दल सरकारच्या भूमिकेवर सर्वोच्च न्यायालयाच्या सुनावणीनंतर भाजप प्रदेशाध्यक्ष चंद्रकांत पाटील यांनीही ताशेरे ओढले. सरकारची पूर्वतयारी नसल्याने मराठा आरक्षणाची स्थगिती कायम राहिली. ही ठाकरे सरकारची नाचक्की आहे. न्यायालयात पुन्हा-पुन्हा तेच तेच मुद्दे मांडले गेले. जेव्हा पुनर्विचार याचिका दाखल केली जाते, तेव्हा नवे मुद्दे मांडायचे असतात. मात्र, न्यायालयापुढे मुकुल रोहतगी यांनी कोणतेही नवे मुद्दे मांडले नाहीत, असे चंद्रकांत पाटील म्हणाले होते.