राज्यात सुरू असलेली आणि प्रस्तावित विविध विकासकामे मिशन मोडवर पूर्ण करावीत. जेणेकरून सामान्य नागरिकांना त्याचा लाभ मिळू शकेल, असे निर्देश मुख्यमंत्री एकनाथ शिंदे यांनी आज येथे विविध विभागांच्या सचिवांना दिले.
खासदार गजानन किर्तीकर, खासदार गोपाळ शेट्टी, आमदार अमित साटम, आमदार संजय गायकवाड या लोकप्रतिनीधींच्या मतदार संघांमधील विविध विकास कामांविषयी आढावा घेणारी बैठक सह्याद्री अतिथीगृह येथे झाली. त्यावेळी मुख्यमंत्री एकनाथ शिंदे बोलत होते. उद्योगमंत्री उदय सामंत यांच्यासह विविध विभागांचे अपर मुख्य सचिव, प्रधान सचिव, सचिव यावेळी उपस्थित होते.
लोकप्रतिनिधींच्या मतदार संघांमध्ये सुरू असलेले रस्ते, उद्याने, जलसिंचन प्रकल्प, वळण रस्ते, उड्डाण पुल ही विकास कामे कालबद्धरित्या पूर्ण करण्यासाठी प्रशासकीय यंत्रणांनी मिशन मोडवर काम करावे, असे मुख्यमंत्र्यांनी सांगितले. या सर्व विकास कामांचा प्रत्यक्ष फायदा सामान्यांना मिळाला पाहिजे. त्यासाठी आवश्यक त्या प्रक्रियांना गती देऊन कामे पूर्ण करण्याचे निर्देश मुख्यमंत्र्यांनी यावेळी दिले.
यावेळी खासदार किर्तीकर, शेट्टी यांनी मुंबई महापालिका क्षेत्रातील खेळाची आणि मनोरंजनाची मैदानं देखभाल तत्वावर हस्तांतरीत करण्यास शासनाने दिलेली स्थगिती उठवावी, अशी मागणी केली. याबाबत सविस्तर चर्चा बैठकीत करण्यात आली. यासंदर्भात एक धोरण तयार करण्याचे निर्देश मुख्यमंत्र्यांनी मुंबई महापालिका आयुक्तांना दिले. वर्सोवा अंधेरी येथील खाडीतील गाळ काढणे, त्याठिकाणी नविन मच्छीमार जेट्टी बांधणे याविषयी चर्चा झाली.
आमदार संजय गायकवाड यांच्या बुलढाणा मतदार संघातील विविध विषयांबाबत यावेळी चर्चा झाली. बोदवड परिसर उपसासिंचन योजनेमुळे सुमारे ४३ हजार हेक्टर जमिन सिंचनाखाली येणार असून त्यामुळे परिसरातील शेतकऱ्यांना त्याचा फायदा होणार त्यामुळे या योजनेला गती द्यावी, असे निर्देश मुख्यमंत्री शिंदे यांनी जलसंपदा विभागाच्या अपर मुख्य सचिवांना दिले.
बुलढाणा शहरा लगत कृषी महाविद्यालय स्थापन करणे, मोताळा तालुक्यात नविन एमआयडीसी स्थापन करणे, बुलढाणा शहराला रिंग रोड मंजूर करून बुलढाणा-खामगाव रस्त्यावरील बोथा अभयारण्यात उड्डाणपुल बांधणे, राजूर घाटात एकेरी वाहतूक करणे आदी विविध विषयांवर सविस्तर चर्चा झाली.
हेही वाचा : अजित पवार घोटाळेबाज, ताईंनाच अध्यक्ष करा; राष्ट्रवादीच्या माजी आमदारांचं मोठं वक्तव्य
