गतविजेता वेस्ट इंडिज संघ यंदाही टी-२० वर्ल्डकपचे (T20 World Cup) जेतेपद पटकावणार, असा माजी कर्णधार डॅरेन सॅमीला विश्वास आहे. सॅमीच्या नेतृत्वातच विंडीजने २०१६ साली झालेल्या अखेरच्या टी-२० वर्ल्डकपचे जेतेपद पटकावले होते. चुरशीच्या झालेल्या अंतिम सामन्यात कार्लोस ब्रेथवेटने मारलेल्या चार षटकरांमुळे विंडीजने इंग्लंडला पराभूत करत दुसऱ्यांदा ही स्पर्धा जिंकली होती. विंडीजच्या संघात मॅचविनर खेळाडूंची भरणा असून हा संघ परिस्थितीशी लवकरच जुळवून घेतो. त्यामुळे विंडीजचा संघ जेतेपदाचा प्रमुख दावेदार असल्याचे सॅमीला वाटते.
आक्रमक शैलीत खेळणारे खेळाडू संघात
वेस्ट इंडिजच यंदाही टी-२० वर्ल्डकपचे जेतेपद पटकावणार यात जराही शंका नाही. मी विंडीजचा माजी खेळाडू असल्याने त्यांच्या बाजूने बोलत असल्याचे लोकांना वाटू शकेल. परंतु, आमच्या संघाला मागील तीन टी-२० वर्ल्डकप स्पर्धांची अंतिम फेरी गाठण्यात यश आले होते आणि आम्ही दोन वेळा जेतेपद पटकावले. आमच्याकडे कर्णधार किरॉन पोलार्ड, क्रिस गेल, आंद्रे रसेल, जेसन होल्डर आणि एव्हिन लुईससारखे उत्कृष्ट खेळाडू आहेत. या खेळाडूंमध्ये आक्रमक शैलीत खेळ प्रतिस्पर्ध्यांवर दबाव टाकण्याची क्षमता आहे, असे सॅमी म्हणाला.